O marisqueo asinou en decembro a mellor campaña de Nadal da súa historia. Así se desprende dos datos que manexa a Xunta, que revelan que a lonxa de Campelo pechou o mes pasado cunha facturación de 1.850.202,35 euros, a cifra máis alta desde que hai datos.
"Os prezos axudaron moito. Ninguén se esperaba algo así estando a restauración medio pechada", recoñece a presidenta da Agrupación de Mulleres a Pé de San Telmo de Pontevedra, a confraría máis numerosa das tres que existen na ría de Pontevedra. "A xente comprou máis para a casa", engade.
A falta de xénero nas depuradoras de marisco, as dificultades para atopar mercancía en Portugal e unha maior demanda do mercado interno e externo levaron ao sector a despedir ao grande un ano marcado pola pandemia do coronavirus e polas toxinas.
A incidencia da covid obrigou a paralizar a actividade marisqueira durante case toda a pasada primavera. A maiores, en 2020 tamén se contabilizaron catro peches por toxinas, que impediron a extracción de bivalvos nas praias do fondo da ría durante 85 días, a cifra máis alta desde 2016, cando as xornadas de paro por episodios de lipofílicas alcanzou as 111.
A pesar desta situación, os traballadores do mar chegaron a decembro subidos a unha onda de bos prezos do mes anterior, cando a Xunta decretara novas restricións á hostalería polo repunte de casos de covid-19 na área sanitaria de Pontevedra. A poxa da lonxa de Campelo pulverizou varias marcas.
"Os prezos axudaron moito. Ninguén esperaba algo así estando a restauración medio pechada"
O primeiro deles bateuno a ameixa fina, que marcou o seu valor máis alto en poxa ao alcanzar os 71,92 euros por quilo. Esta variedade de bivalvo, a autóctona do país, deixou de ser predominante nas praias do fondo da ría a partir de 2005. Desde entón, a xapónica foi gañándolle terreo, ata o punto de que se converteu xa na que máis beneficios económicos xera ao marisqueo.
Aínda que de orixe asiática, os parentes máis próximos a este molusco veñen de Norteamérica, segundo un estudo do Consello Superior de Investigacións Científicas (CSIC). Se os 8.904 quilos de ameixa fina vendéronse por 327.251 euros, os 89.388 quilos de xapónica xeraron 1.206.416 euros. Esta última variedade non só bateu o seu rexistro de facturación nun mes de decembro, senón tamén o de volume de capturas.
O berberecho tamén regresou con forza á rula de Poio tras anos de parón por culpa da marteilia, un parasito detectado en 2012 que diezmó a súa poboación. E fíxoo coa recollida de 13.394 quilos que se comercializaron por 112.756 euros, oito veces máis que en 2019.
Os bivalvos facturaron nove de cada dez euros da lonxa de Campelo, que pechou 2020 cun volume de negocio de 5.244.827,09 euros, un 13,2% menos que durante o exercicio anterior. No resto de rulas da ría, a tendencia mantívose á baixa durante o ano da covid. A maior caída foi en Portonovo, seguida, por esta orde, de Bueu, Pontevedra, Aldán-Hío, Marín e Campelo.
Só un día perdido. O parón supuxo a perda de só un día do traballo, o 18 de xaneiro, xa que o resto da semana non había faena.
Os positivos, de baixa. O Sergas realizou un cribado a 580 profesionais das tres confrarías da ría para detectar posibles casos de covid. Os resultados non son públicos. Os positivos cobrarán a baixa.
474 mariscadores a pé. O sector do marisqueo a pé conta con 474 traballadores.
