Doctoralia, unha aplicación que permite pór en contacto a médicos e pacientes, revelou este mércores os nomes dos gañadores e finalistas da sexta edición dos Doctoralia Awards e, entre eles, atópase un facultativo que exerce en Pontevedra: o doutor Alfonso Amado Puentes, que quedou no segundo posto da categoría de Neuroloxía.
O facultativo, que está especializado en neuropediatría e dispón dunha clínica privada, xa foi nomeado nas edicións de 2015 e 2016 e alzouse como gañador nas dúas últimas. Os premios son os únicos que, segundo Doctoralia, "distinguen os profesionais da saúde máis valorados na súa especialidade por compañeiros de profesión e polos seus propios pacientes".
Con 409 profesionais nomeados, a sexta edición dos premios é a que presenta maior número de candidatos, dos que 240 foron nomeados por primeira vez.
En Galicia, hai outros tres profesionais que chegaron ás primeiras posicións: Norberto Gómez (Vigo), que foi gañador da categoría de Reumatoloxía; Enrique Mena del Río (A Coruña), que quedou no terceiro posto de Cirurxía xeral e dixestiva, e Pablo Somoza (A Coruña), terceiro en Neurocirurxía.
A selección faise en función das opinións dos pacientes, as votacións de profesionais e as contribucións á sección "Pregunta ao Experto" de Doctoralia, onde se resolven dúbidas médicas.
