Os médicos de Atención Primaria da área sanitaria renovaron as mobilizacións que emprenderon en xaneiro para reclamar máis medios, máis persoal e, en definitiva, máis tempo para dedicarlle ao paciente. A diferenza fronte ás anteriores é que a organización das protestas correu a cargo dos propios facultativos, que decidiron prescindir das forzas sindicais e mover ficha como membros da Asemblea de Áreas Sanitarias, AAS, un conxunto de siglas que fai unha chiscadela ao ácido acetilsalicílico e que fai que xa se empece a falar dos médicos díscolos "aspirinos".
Os galenos non aceptan o pacto selado a finais de abril entre os sindicatos e o Sergas, co que se desconvocou a folga promovida desde Primaria. Ao seu xuízo, a maioría das reivindicacións quedáronse no tinteiro, polo que decidiron desmarcarse da mesa de negociación anterior e convocar novos paróns. Os primeiros terán lugar na área sanitaria de Vigo os próximos días 21 e 22 de maio, mentres que en Pontevedra e o resto de áreas a folga foi fixada para o 19 de xuño. "Estamos fartos de que nos tomen o pelo. As reunións non serviron de nada, pero vemos que agora si hai apoio, porque cando se desconvocou a folga a xente se cabreó moito", indicou onte un dos promotores da asemblea, o doutor de Lérez, Luís Fransi.
Polo de súpeto, médicos e outro tipo de profesionais sanitarios celebraron onte concentracións nos ambulatorios do municipio, nas que bateron a marca de participación. De feito, foi a primeira vez que os facultativos fixeron piña nas portas do centro de saúde da Parda e unha das mobilizacións máis numerosas das que tiveron lugar nos últimos meses no Virxe Peregrina. Ademais, o persoal sanitario concentrouse no centro de saúde de Monte Porreiro e noutros puntos da área sanitaria. Todo grazas ás redes sociais e o WhatsApp, que facilitou a coordinación dos profesionais. A folla de ruta continuará coa celebración o vindeiro mércores dunha asemblea na sede do Colexio Oficial de Médicos de Pontevedra e unha posterior concentración no ambulatorio Virxe Peregrina en sinal de apoio á folga prevista en Vigo.
