O ano máis tráxico da última década, 2017, a comunidade calcinou 62.000 hectáreas, cinco veces a superficie do municipio de Pontevedra. Ao exercicio seguinte, os incendios deron conta de 2.600 hectáreas, algo así como tres cuartas partes do termo municipal de Poio. E o pasado ano, o lume ocupouse de 6.800 hectáreas, case dúas veces o chan sobre o que se asenta o Concello de Marín. Nesta ocasión, a Xunta espera pechar 2020 por baixo das 17.000 hectáreas queimadas. O prognóstico é que será un verán quente para os incendios e o goberno autonómico apura os traballos de prevención.
O orzamento deste bloque de tarefas antiincendios nas catro provincias supera os 2,5 millóns e o obxectivo é baixar das 17.000 hectáreas queimadas na comunidade
Este xoves a consellería de Medio Rural adxudicou tres obras por valor de 280.524 euros para a realización de tratamentos silvícolas preventivos en varios montes da provincia de Pontevedra. O financiamento corre a cargo do programa europeo Feader e enmárcase no Plan de Desenvolvemento Rural. A superficie sobre a que se actuará supera as 160 hectáreas, nas que se executarán tarefas de xestión da biomasa, para crear discontinuidades verticais e horizontais da cuberta vexetal, ademais de controis da vexetación para eliminar material combustible a través de rozas, podas ou rareos.
Os traballos afectarán a parcelas dos municipios de Crecente, Caldas, Pontecesures, Vigo e Gondomar. En toda Galicia, a Consellería de Medio Rural completará un total de 27 tratamentos silvícolas preventivos, cun investimento de 2,5 millóns de euros, que afectarán a 2.170 hectáreas.
Ademais, está en tramitación outro procedemento de restauración do potencial forestal danado, consistente en 6 obras licitadas por valor de 3,38 millóns de euros.
Un total de 120 cámaras vixiarán o 59% de todo o territorio galego para localizar os incendios e tamén aos infractores
A loita contra o lume mobilizará este ano algo máis de 7.000 efectivos entre o persoal dos concellos, a Xunta, Goberno central, exército e os corpos de seguridade do Estado.
Desde o Executivo autonómico trabállase con obxectivos concretos en materia de incendios. Por exemplo, preténdese que este ano a media de superficie queimada por cada lume non chegue a cinco hectáreas. E que os lumes de máis de 25 hectáreas estean ao final da tempada por baixo do 2%. Ou tamén que non se activen máis de trece veces as situacións de tipo 2, nas que ven vivendas ameazadas polo lume.
Para a campaña deste ano haberá 120 cámaras operativas nunha rede de videovigilancia que cubrirá o 59% do territorio, cinco puntos por encima do que se abarcaba no Pladiga de 2019.
Este verán repetirase a operación Sentinela das Forzas Armadas, na que a Brilat repetirá un despregamento similar ao do verán de 2019, cando contaron con 460 militares que percorreron uns 350.000 quilómetros. Pola súa banda, a Unidade Militar de Urxencias (UME) tamén estará a disposición da Xunta se se require a súa intervención.
