O Casino Mercantil e Industrial escoitará ofertas para a venda da súa sede nobre da Praza de Curros Enríquez. O histórico edificio Varela, levantado na zona monumental a partir de 1896 tras a derriba do antigo Hospital do Corpo de Deus, sairá ao mercado inmobiliario.
O acordo de desprenderse do inmoble foi adoptado por maioría na asemblea de carácter extraordinario que se celebrou este venres na propia sede da sociedade e que resultou moi tensa.
Co visto e prace que recibiu a proposta da xunta directiva en funcións ábrese un proceso para "sondar o mercado inmobiliario" e estudar as posibles ofertas de entidades, empresas ou particulares que poidan estar interesados na adquisición do antigo edificio Varela que o Casino Mercantil adquiriu o 14 abril de 1998 por 306 millóns de pesetas (1,8 millóns de euros). O inmoble fora completamente restaurado pola Caixa Postal, que posteriormente o vendeu ao construtor Eugenio Sobral.
O edificio que alberga a sede social da entidade que preside Ernesto Filgueira conta cun baixo (alugado a Burguer King ata 2028) e dúas plantas de 400 metros cadrados, ademais dun ático. O Mercantil continúa pagando a hipoteca do seu edificio principal, un gravame do que se liberou en parte co aluguer do baixo á citada franquía de comida rápida.
Algúns dos asistentes á asemblea sospeitan que algunha empresa hostaleira podería estar interesada na adquisición do edificio, situado no corazón da zona monumental. En todo caso, o equipo directivo en funcións garante que o proceso para o estudo das propostas será "totalmente transparente".
Ernesto Filgueira recoñece que xa recibiron unha proposta informal por parte dunha persoa que se dedica ao mercado inmobiliario que estaba interesada en saber se a entidade estaría disposta a vender o edificio. No entanto, puntualiza que deberá ser a asemblea a que analice as ofertas formais para autorizar a operación se esta resulta atractiva desde o punto de vista económico.
A asemblea non tomou ningún acordo sobre a posibilidade de buscar un local para trasladar a sede social do Mercantil e seguir desenvolvendo as actividades de lecer, culturais e recreativas no caso de que se produza a venda do edificio de Curros Enríquez.
Ademais, ao non haberse presentado ningunha candidatura nas eleccións convocadas pola entidade para a renovación da xunta directiva, a asemblea acordou a continuidade do actual equipo ata outubro de 2021, cando finalizan os catro anos de mandato do equipo que preside Ernesto Filgueira. A xunta directiva reforzarase coa incorporación dalgún membro máis.
O Mercantil é unha das sociedades emblemáticas de Pontevedra. Aínda que foi fundada o 17 de novembro de 1928, non foi ata o 21 de decembro dese ano cando a súa primeira xunta inscribiuna no Rexistro de Sociedades.
O Casino Mercantil e industrial tivo distintas sedes. Comezou as súas actividades nun local da avenida de Santa María, en concreto no número 4, baixo. ao pouco tempo chegou a un acordo cos propietarios do Bar Carrillo e do edificio situado na rúa fernández Villaverde para instalar alí a súa sede social. inaugurada o 11 de maio de 1929, destacaba polas súas amplas ventás. Trinta anos máis tarde o inmoble foi derrubado a causa do desenvolvemento urbanístico. Esta circunstancia obrigou á sociedade a buscar un novo local ao que trasladar a súa sede: o edificio onde ata fai algo máis de dous anos estaba situada a oficina Principal do Banco de Santander.
O Mercantil adquiriu o solar do antigo Hotel Engracia, que estaba situado na rúa andrés Muruáis. aí construíuse o primeiro edificio en propiedade da entidade, inaugurado en decembro de 1965.
En 1989, para facer fronte ás débedas, a entidade viuse obrigada a vender este local ao Ministerio de Economía e Facenda. foi entón cando a sociedade trasladou a súa sede á rúa Laranxo de forma provisional, ata a adquisición dun discreto local situado na rúa Castelao.
A situación económica mellorou e isto permitiulle adquirir a actual sede de Curros Enríquez.
