O Casino Mercantil e Industrial desexa ter sobre a mesa algunha oferta formal para a venda do edificio da súa sede social, situado na Praza de Curros Enríquez. A xunta directiva que preside Ernesto Filgueira, consciente de que a actual situación de crise sanitaria e económica non é o escenario propio para efectuar unha operación inmobiliaria desta envergadura, decidiu publicitar o acordo adoptado pola asemblea o pasado 14 de febreiro para desprenderse do edificio mediante a colocación dunha pancarta situada nun dos balcóns do histórico edificio Varela, levantado na zona monumental a partir de 1896 tras a derriba do antigo Hospital do Corpo de Deus.
A entidade aínda non adoptou ningún acordo sobre a posibilidade de buscar un local para trasladar a súa sede social e seguir desenvolvendo as actividades de lecer, culturais e recreativas no caso de que se produza a venda do edificio de Curros Enríquez.
"Houbo algunhas persoas que se interesaron polas características físicas das nosas instalacións, pero non recibimos ningunha proposta económica", asegura Filgueira. Ademais, advirte de que só se terán en conta as ofertas por escrito para evitar que calquera persoa ou entidade vaian esculcar sen ter intención de efectuar unha proposta económica formal.
O edificio conta cun baixo (alugado a Burguer King ata 2028) e dúas plantas de 400 metros cadrados, ademais dun ático. O Mercantil continúa pagando a hipoteca do seu edificio principal, un gravame do que se liberou en parte co aluguer do baixo á citada franquía de comida rápida. Conta con cafetería, comedor, salas de conferencias, zonas de descanso, ximnasio, oficinas e áreas multiusos nas que se desenvolve un amplo programa de actividades.
SEN PREZO MÍNIMO. O Casino Mercantil non fixou un prezo mínimo que estaría disposto a aceptar polo inmoble. "O valor do edificio teno que decidir a persoa que estea interesada en adquirilo", matiza o presidente da entidade recreativa. A sociedade adquirira o edificio o 14 de abril de 1998 por 306 millóns de pesetas (1,8 millóns de euros). O inmoble fora restaurado completamente pola Caixa Postal, que posteriormente o vendeu ao construtor Eugenio Sobral.
O Casino Mercantil é unha das sociedades emblemáticas de Pontevedra. Aínda que foi fundada o 17 de novembro de 1928, non foi ata o 21 de decembro dese ano cando a súa primeira xunta inscribiuna no Rexistro de Sociedades.
