O conselleiro de Sanidade, Jesús Vázquez Almuiña, supervisou este venres a fase final da remodelación dos espazos do Hospital Montecelo que dotará a este centro da EOXI de Pontevedra e O Salnés cunha segunda resonancia magnética, que funcionará de xeito simultáneo coa unida de diagnóstico que xa está operativa.
"É unha resonancia de última xeración que nos leva a modificar tamén a estrutura do servizo de Radioloxía, algo que queremos facer en concordancia co futuro proxecto do Gran Montecelo", asegurou Vázquez Almuiña durante a visita. O titular de Sanidade, que estivo acompañado polo xerente da EOXI de Pontevedra e O Salnés, José Ramón Gómez, xunto con outros responsables sanitarios do Sergas, destacou que este novo aparello posúe os máis avanzados sistemas de imaxe, diagnósticos máis precisos e estudos máis rápidos.
A previsión é que o novo aparello estea en funcionamento a principios de xaneiro, co que se diminuirá "a lista de espera, que xa está en cifras razoables, pero tamén se mellorará o número de exploracións sobre o que se está facendo nestes momentos", asegurou o conselleiro.
Esta nova resonancia magnética está dotada cun imán de última xeración máis curto, o que fará que se reduza a sensación de claustrofobia e que mellore o confort do paciente. Ademais, conta cun avanzado sistema de redución de ruído acústico e un sistema de guiado ao paciente por voz, a través do que se indicará ao usuario as fases do estudo e as pautas a seguir durante a proba.
O investimento público do Sergas para a obra de instalación desta nova unidade supera os 490.000 euros, aos que hai que engadir o correspondente ao novo equipo, que a Administración sanitaria pública galega xestionou a través da figura contractual do Socio Tecnolóxico, que supera os 900.000 euros.
Unha vez termínese a instalación do novo equipo procederase a executar a seguinte fase de remodelación de espazos en Montecelo, na que a EOXI contempla o acondicionamento da sala de informes, así como a completa renovación da actual resonancia magnética.
Ante a petición realizada polo Concello de que as leiras dos ‘leiraparks' se incluisen no proxecto supramunicipal para a ampliación, Vázquez Almuiña explicou que esa solicitude "chegou cando xa pasara a exposición pública do proxecto ambiental", polo que incluír ese ámbito "restrasaría moito a obra". Con todo, destacou que está aberta a posibilidade "de que o Concello expropie en paralelo, con toda a colaboración da Xunta"
