A Comunidade de Montes de Mourente baralla a posibilidade de resolver pola vía xudicial o conflito que mantén coa Consellería de Sanidade polo aluguer dos terreos nos que está instalado o Hospital Montecelo. O colectivo parroquial tampouco descarta citar ante os tribunais de Xustiza á Deputación para que se lle recoñeza que a parcela na que se asenta o Centro Príncipe Felipe é de propiedade veciñal e chegar a un consenso sobre o pago dun canon.
Son estes dous dos principais asuntos que figuran na orde do día da asemblea que celebrarán os comuneiros no salón de actos da Sociedade Cultural e Deportiva de Mourente o vindeiro domingo, a parir das 11.30 horas. A xunta directiva que preside Xosé Carlos Morgade informará as xestións que efectuaron ante o Sergas e a Deputación para intentar avanzar con vistas a chegar un acordo que, de momento, non se alcanzou. En todo caso, será a propia asemblea a que decidirá a estratexia que seguirá para forzar ás administracións implicadas a negociar.
No caso dos terreos ocupados polo Hospital Montecelo, os comuneiros presentaran o pasado día 3 un escrito ante a Consellería de Sanidade no que reclamaban a apertura inmediata de negociacións cando están a piques de cumprirse dous anos desde que unha sentenza do Tribunal Supremo declarase firme a titularidade veciñal dos terreos (que ocupan unha superficie de 4 hectáreas) a favor dos veciños de Mourente.
No seu escrito, Mourente recordáballe á Xunta de Galicia que logo da comunicación anterior do mes de xaneiro —na que ameazaba con acudir aos tribunais se o Sergas non resolvía sobre a ocupación duns terreos que desde xullo de 2018 son propiedade comunal—, representantes da Consellería de Sanidade mantiveron o 11 de febreiro unha reunión en Santiago de Compostela con representantes dos comuneiros na que reiteraron a súa preferencia pola expropiación dos terreos, aínda que estaban dispostos a escoitar as condicións dunha posible cesión de uso se incluían a necesaria garantía xurídica que dese cobertura ás obras do Gran Hospital.
Os representantes dos comuneiros adiantaron unha oferta provisional que os representantes do Sergas cualificaron de "aceptable", comprometéndose a dar resposta en poucos días. "Desde aquela a Xunta de Galicia foi poñendo escusas para non dar contestación á proposta, primeiro aducindo ou estado de alarma pola pandemia, mentras que agora xa nin dá unha escusa", sinala portavoces da xunta reitora da Comunidade de Montes.
Mourente non entendería que a Consellería decidise iniciar un proceso expropiatorio que significaría o pago de polo menos varios centos de miles de euros cando os comuneiros realizaron unha oferta de canon cualificada de "razoable" polo Sergas, ao que o gasto sanitario incrementóuselle considerablemente por causa da pandemia provocada pola Covid-19.
A crise sanitaria paralizou o proceso de negociación que iniciaran a Deputación e a Comunidade de Montes de Mourente para o recoñecemento, como veciñais, das 15 hectáreas nas que está situado o Centro Príncipe Felipe. Logo de varias reunións, comuneiros e Administración provincial están moi lonxe de alcanzar un acordo extraxudicial.
