Asegura que vive un inferno desde o pasado 9 de xaneiro. Pilar Somoza Martínez, que reside na rúa Gagos de Mendoza (en concreto no número 4-1ºD) presentouse este mércores na entrada do Consistorio cunha cadeira e unha pancarta para denunciar que unhas obras de reforma no piso inmediatamente superior (que comezaron en setembro) están a sumila "nun estado de tensión insoportable".
Explica que a pinga que colmou o vaso da súa paciencia rexistrouse o citado 9 de xaneiro, cando á primeira hora da tarde esborrallouse un anaco da placa do teito dunha das habitacións.
A afectada indica que foi o fontaneiro que realizaba as obras para o cambio dun baño quen llo comunicou e escusouse polo que ocorrera. "Foi unha cousa que pasou e non armei balbordo algún nin protestei, pero pasaron varios días e nin a propietaria do piso nin o construtor que realizaba as obras, Balboa e Buceta, non só non se puxeron en contacto comigo senón que os traballos continuaron coma se non ocorrese nada, con moito ruído e retumbando as paredes coma se se rexistrase un terremoto".
"Co paso dos días seguen aumentando o número de gretas na casa, cun ruído atronador"
Foi entón cando a prexudicada chamou á Policía Local, que levantou acta e inspeccionou as obras, ademais de indicarlle a posibilidade de que interpuxese a correspondente denuncia no Concello. A muller non o comunicou porque, asegura, "non quixen ser mala veciña" e porque, ademais, estaba convencida de que co parte que redactaran os funcionarios municipais era suficiente para unha inspección do Servizo de Disciplina Urbanística.
Pilar puxo o caso en mans dun asesor xurídico que instou á Administración local a que lle entregase a documentación acreditativa da concesión da licenza de obra. "A día de hoxe non tivemos resposta", subliña.
O 14 de febreiro Pilar dirixiuse ao Servizo Municipal de Disciplina Urbanística para saber se tiña previsto actuar en base á documentación que lle presentou a propia afectada e o parte que redactara a Policía Local. "Quedaron alucinados de como era posible que aguantásemos tanto tempo esas obras, coas que reformaron totalmente o piso, levantado tubaxes e, incluso, tirando tabiques para, presuntamente, cambiar o baño de sitio", comenta a prexudicada.
"Non podo entender como o Servizo de Disciplina Urbanística non tivo en 37 días cinco minutos para ir ver a obra"
Pilar atopouse con que "ninguén tocara o expediente da Policía Local, polo que lle metemos présa porque co paso dos días seguen aumentando o número de gretas na casa, cun ruído atronador".
"O meu avogado di que a licenza que solicitaron é unha petición para facer modificacións no baño, cando o que realmente fixeron foi cambialo para outro lado do piso".
A denunciante indica que se dirixiu en tres ocasións ao Concello pero sen resultado algún. "O pasado luns 17 cambiaron as fiestras e rompéronme os mesados das fiestras. Incluso en dúas ocasións cortáronme a luz durante todo o día
"Non podo entender como cunha denuncia e un informe policial tan serio o Servizo de Disciplina Urbanística non teña en 37 días cinco minutos para ir ver a obra", sinala Pilar, contrariada coa decisión que adoptou o Concello o pasado 7 de febreiro (días logo de presentar a denuncia e o informe policial) de autorizar a ampliación do prazo das obras, porque este esgotouse.
