Tres concellos da área sanitaria Pontevedra-O Salnés (Portas, A Illa de Arousa e Campo Lameiro) levan polo menos dúas semanas sen rexistrar ningún caso de covid-19, mentres que outros cinco (Barro, Caldas, Forcarei, O Grove e A Lama) cumpren un mínimo de sete días na mesma situación, segundo os datos que manexa o Sergas. O mapa da incidencia acumulada reflexa, ademais, que Soutomaior, Ponte Caldelas e Vilaboa seguen mellorando a súa situación, mentres que Poio sofre un lixeiro repunte.
En canto ao balance diario, a cifra de casos activos segue caendo. Son xa 541 (-58), tras rexistrarse apenas 11 novos diagnósticos, a cifra máis baixa en catro meses, pois na última xornada expedíronse 69 altas epidemiolóxicas.
Dos 541 pacientes, 506 evolucionan nos seus domicilios e outros 35 están hospitalizados, oito deles (-1) na UCI, e outros 27 (-2) en planta: 24 en Montecelo e tres no Hospital do Salnés. Neste mesmo período realizáronse 941 PCR, cifra similar á da véspera.
