A Santa Clara sóbranlle pretendentes. De museo a biblioteca, pasando por escola infantil, centro de día, albergue ou centro creativo. Tras facerse oficial a compra do complexo, xorde a pregunta da que se dedicará. Unha parte da incógnita está resolta, os xardíns serán de uso público e abriranse á cidadanía, pero falta detallar mediante estudos técnicos os usos que se lle dará ao edificio, que suma 5.417 metros cadrados.
Sobran ideas para converter o convento nun novo equipamento que, respectando a súa estrutura e valor arquitectónico, albergue un novo uso de interese para a cidadanía. "Eu o que teño claro é que ten que ser un lugar que reúna á xente, moi aberto, que teña o maior interese público posible para toda a cidadanía", di a arquitecta María Pierres, que indica que a cidade xa conta con moitos edificios dedicados ao Museo de Pontevedra e opta máis ben por equipamentos de tipo social, como garderías ou centros de día para maiores.
O convento xa espertou o interese da Asociación de Amigos do Camiño Portugués a Santiago cando quedou baleiro. "Nós mesmo tratamos de negociar coas Clarisas que nos cedesen as habitacións para o uso dos peregrinos nos días nos que non tiñamos sitio e tiñamos que habilitar pavillóns, antes da reforma do Albergue", conta Tino Lores, presidente do colectivo, que apunta a que a intervención nas celas das relixiosas sería mínima xa que manterían o seu uso como dormitorio para os camiñantes que recalen en Pontevedra. "Entendemos que é un edificio municipal e será o Concello o que decida e, independentemente do que se faga, a noticia da compra é moi boa", explica o hospitaleiro.
No mesmo sentido, a directora da Escola de Deseño e Moda de Galicia (Esdemga), Lola Dopico, que foi tamén concelleira de Cultura, apunta a posibilidade de converter o espazo nun centro de creación. "É unha idea ás toas, sen ter os estudos e os datos que terá o Concello, pero en Galicia non existe un centro de creatividade vencellado co sector da moda, con salas de exposicións, un arquivo de coleccións de moda... en Galicia temos moito que dicir sobre iso e en Pontevedra hai estudantes de Esdemga que teñen feito coleccións moi relevantes que se poden poñer en valor nun centro dese tipo", explica Dopico, que destaca que esta é unha opinión persoal sen contar cunha análise pormenorizada das necesidades e prioridades da cidade.
No que coinciden a maioría das persoas relacionadas coa cultura e o urbanismo é en que a adquisición é unha excelente noticia. Explícao Xaime Toxo, presidente do Ateneo de Pontevedra, que indica que incluír Santa Clara e os seus xardíns no armazón urbano suporá "ampliar esa idea de Pontevedra como cidade histórica na que o patrimonio forma parte do común da urbe". Toxo non ten claro o uso que daría aos edificios do cenobio, e indica que será necesario facer moitos estudos para garantir que os inmobles manteñan a esencia do que foron. "Non lle podemos dar un uso que non concorde co que foi, penso que hai que fuxir de calquera alteración dos compoñentes históricos e da mistificación", conta.
Neste sentido, non ve con malos ollos a posibilidade de que o edificio que acollía o convento pase a formar parte do Museo de Pontevedra, que conta xa con seis inmobles, con obras pendentes para a súa remodelación, e o plan de construír un novo edificio en Valdecorvos.
A arquitecta Teresa Táboas aposta por un museo que achegue o urbanismo e a arquitectura da cidade na historia aos seus veciños
MUSEO DE PONTEVEDRA. Quen tampouco descarta que Santa Clara se sume á lista de edificios cos que conta a entidade museística provincial e a propia Deputación, da que depende. A presidenta provincial, Carmela Silva, destacou que se trata dunha "grandísima noticia" a adquisición do convento de Santa Clara por parte do Concello e tachou a decisión municipal de "espectacular". Pola súa banda, o propio César Mosquera, vicepresidente da institución e responsable do Museo, explicaba este venres que "a min preguntáronme se pensaba en Santa Clara para o Museo e contestei que si porque a miña obriga é pensar no Museo sempre, pero hai que ter en conta as necesidades de todas as Administracións, non imos entrar nunha rifa para decidir a que se dedica".
Mosquera explicou que o Museo de Pontevedra xa colaborou na realización dos estudos previos sobre o estado do inmoble e recordou que hai moitos aspectos pendentes de resolver, como os accesos aos xardíns, xa que o convento, ao ser de clausura, está moi illado da cidade.
Existe tamén a opción de que o convento se converta nun museo independente dedicado a unha temática concreta. A arquitecta Teresa Táboas, por exemplo, propón a creación dun espazo interactivo no que se mostren cuestións relativas ao urbanismo da cidade, a evolución da arquitectura popular e os diferentes modelos de urbe que se expuxeron na historia. "Sería unha forma de entender a transformación urbana da cidade", algo especialmente relevante nunha cidade como Pontevedra, que dá tanta importancia ao seu modelo.
