Apunten o seu nome: Naiara Ameal Sangiao. Morañesa de 16 anos, estuda o segundo curso de FP básica na modalidade de Perruquería e Estética no IES Montecelo e é xa, por méritos propios, unha nova promesa da arte de cortar, peitear e dar vida e cor ás cabeleiras. Non só ten o talento, senón tamén a disciplina e, sobre todo, a motivación que lle faltaba hai dous anos, cando estudaba Secundaria nas aulas do CPI Santa Lucía. "Non rematei a ESO porque non a daba sacado. Decidín vir para aquí para poder ser auxiliar de algo e ter un título disto", aínda que á súa familia custoulle aceptalo nun principio, conta xunto á súa profesora Patricia Diz, quen se desfai en afagos con ela. "Aquí tamén hai que estudar, pero é máis a parte práctica".
A moza é de poucas palabras. ela fala coas mans, o peite e as tesoiras, sobre todo se diante ten unha desas cabezas de maniquís coa que poder experimentar un arriscado cambio de look como o que a levou a dar a badalada na pasada edición de Galicianskills. Na competición de estudantes de Formación Profesional enfrontouse no IES Lambas de Abade de Santiago a un alumno do ciclo superior e a dous de 2º do ciclo medio. A unha delas superouna. "O gañador tivo 437 puntos, a segunda 420 e Naiara 417. A diferenza foi moi pouca", subliña a docente, quen dá por feito de que Naiara volverá competir dentro de dous anos, cando, previsiblemente, estea a cursar 2º do CM de Peiteado.
"Ao principio non quería ir. Houbo que convencela, porque non quería quedar mal", recorda Patricia. Aínda que é habitual na modalidade de xardinería, ela é a primeira persoa de FP básica que acode ao Galicianskills, porque normalmente, explica, "non temos alumnado" nesta fase educativa pensada para mozas que non logran terminar a ESO e queren lograr un título máis orientado ao mercado laboral "co que poidas contar, que veña cada vez que hai que practicar, que sexa responsable e queira facelo ben".
Si que teñen "xente que é boa, que ten habilidade nas mans, que é artista", pero á que lle falta "constancia" ou que "saltan á mínima" ante calquera obstáculo, afeita como está "ás reprimendas na ESO".
Naiara, pola contra, reúne todas as características. "Aprende moi rápido, é concienzuda e ten moitas habilidades persoais á parte da práctica". E, despois, da experiencia, "quere repetir non Skills porque se viu ben alí. É unha posible candidata a gañar". A súa profesora está máis que convencida. "Estouna animando porque está vendo as súas potencialidades e pode acadar o nivel que ela queira".
Tivérona que convencer para apuntarse ao certame a pesar de ser a indiscutible gañadora do concurso organizado entre toda a súa clase. "Fixémolo para que ninguén se sentise excluído. Cada un levou para a súa casa material e un maniquí de salón de peiteado. Pedímoslles que fixeran un recollido para ver as súas habilidades, pero sen terlles explicado nada antes". Pois no curriculum de Básica non se inclúe nin o corte nin o recolleito. O seu guía foron tutoriales de internet ou consellos de redes sociais. Votaron os seus profesores, o equipo directivo e o persoal de limpeza do centro.
"É unha rapaza que aprende moi rápido e é meticulosa, moi meticulosa. E non quere quedar mal. Repetiu mil veces para que lle saíra moi ben e conseguiu facer un corte con técnicas avanzadas e un recollido perfecto. En 15 días acadou a perfección", subliña a docente.
A preselección foi a finais de xuño e na terceira semana de setembro, pouco logo de iniciar o curso, empezou a preparación no centro, dúas tardes por semana. "O Galicianskills foi o 8 de outubro, así que cando faltaba unha semana viñamos todos os días. Naiara ten unhas calidades moi boas porque quere que lle saia ben, non se enfada se o ten que desfacer e tiña moitísima seguridade no campionato", contra alumnos de 19 e 20 anos. "Aguantou o tipo todo o tempo. Esas calidades que ten son idóneas para este tipo de concursos". Non só destaca pola súa habilidade, senón que, engade, "é moi boa compañeira, limpa, recolle, fai as cousas e procura ser mellor que a última vez. De Básica é das mellores".
Ao Skills acudiu cos deberes feitos, como a parte do cor. "Tívose que facer previamente, na aula, e Naiara explicouno nun vídeo". Entre as dúas decidiron o peiteado, un corte "baseado en algo actual, moderno e transgresor". Escolleron un híbrido entre "dous cortes que están de moda entre a xente nova, o mullet e o emo, e para a cor decidimos facer un damero". Tan ben o fixo, subliña Patricia Diz, que "quedou de terceira, pero por moi pouca diferenza". A nena á que lle gustaba peitear ás súas bonecas xa ten a súa vocación elixida. "Agora si que creo que o teño claro".
