Westerns aparte, a morte si ten un prezo, aínda que ser enterrado nun cemiterio ou noutro pode facer variar bastante os gastos fúnebres. En Pontevedra, o Concello realizou o ano pasado unha convocatoria para adxudicar os nichos baleiros tanto no camposanto municipal como no de Ponte Sampaio, pero só logrou cubrir 35 dos 325 que entón estaban sen ocupar. No caso de San Amaro, a tarifa ofertada variou en función da localización de cada espazo, de maneira que as cifras oscilaban entre os 1.303 e os 1.552 euros por unha concesión cun prazo máximo de 75 anos (ao tratarse dun ben municipal en espazo público non se pode vender a perpetuidad).
O montante non dista moito do prezo de venda do metro cadrado de vivenda, pois, segundo as estatísticas de Fotocasa do pasado setembro, en Pontevedra este págase actualmente a 1.681,8 euros de media, aínda que a cifra varía dependendo da localización dentro da cidade.
No veciño municipio de Poio, o Concello aínda non aprobou o regulamento do seu cemiterio municipal de San Xoán nin levou a cabo a tan ansiada ampliación. A intención da Administración local era que os nichos custasen 1.564 euros e que os panteóns tivesen un prezo duns 4.000 euros, aproximadamente. No entanto, como as obras aínda non se realizaron, algúns veciños están a buscar espazos nos cemiterios veciñais das outras parroquias, sobre todo en San Salvador.
En Vigo existen oito cemiterios municipais e alí o prezo por unha concesión de 50 anos rolda os 2.240 euros, aínda que baixa a menos de 400 se o período é de seis anos.
OUTRAS CIDADES GALEGAS. Nas demais comarcas e municipios da provincia, os prezos dos nichos son en grao sumo variados, do mesmo xeito que no resto de Galicia. Lugo ten un dos camposantos máis caros, con tarifas de entre uns 1.000 e 1.716 euros por concesións de 25 anos; mentres que en Ourense un nicho por cinco anos custa 286, aínda que só un dos tres cemiterios municipais existentes na cidade ten espazos dispoñibles.
En terras coruñesas, a capital herculina ofece nichos por preto de 600 euros e outros chegan a superar os 2.000 por un prazo de 35 anos, mentres que en Santiago de Compostela oscilan entre 775 e 817 por unha cesión de 99 anos.
Sexa como sexa, e aínda que nos últimos anos van gañando terreo opcións como a incineración, en Galicia a posesión dun espazo nun cemiterio segue sendo unha prioridade para moitos cidadáns. Este 1 de novembro, como todos os primeiros de novembro, os camposantos enchéronse de actividade para celebrar o Día de Todos os Santos. Miles de persoas foron fieis á tradición de visitar as tumbas dos seus seres queridos xa falecidos e levarlles flores e velas. No caso do cemiterio de Rubiáns (Vilagarcía), un trío musical interpretou varias pezas en directo.
Cemiterio de Santa Mariña de Dozo, en Cambados. JOSÉ LUIZ OUBIÑA
