Nin a pandemia nin as altas temperaturas puideron co espírito da andaina Ultreia, que celebrou este domingo unha estraña terceira edición marcada polas medidas anticontaxios durante todo o itinerario. Na actividade participaron 179 camiñantes, 46 menos que na anterior edición, un número que a organización cualifica de positivo, xa que as circunstancias actuais implican un importante descenso na participación neste tipo de actos.
Os primeiros en completar a ruta foron José Luís Dapena e José Manuel Vázquez Álvarez, que terminaron o percorrido en 6 horas e 57 minutos, o tempo máis curto de todas as edicións da camiñada. Deste xeito, marcaron un marca na historia de Ultreia, un evento organizado porSar Comunicación que conta coa colaboración de Diario de Pontevedra e o respaldo do Plan Social de Ence.
As saídas desde a catedral de Tui producíronse de forma graduada, en grupos de 25 persoas, e os voluntarios mediron a temperatura corporal dos camiñantes. Ademais, o uso de máscara foi obrigatorio para cumprir coas ordes decretadas pola Xunta de Galicia. Segundo a organización, os participantes foron responsables en todo momento e non foi necesario recordar a necesidade de utilizar a máscara. "Quen necesitaba quitarlla un intre apartábase un momento do grupo", indican fontes da organización.
Do mesmo xeito, foi fundamental a colaboración dos axentes da Policía Local de Tui e O Porriño, así como da Garda Civil de Tráfico, no desenvolvemento da marcha.
Unhas 60 persoas venceron a calor e completaron a ruta ata Pontevedra. As chegadas comezaron a producirse ás 16.00 horas e prolongáronse ata as 18.00. Os que non puideron completar todo o percorrido, realizaron só as primeiras etapas do camiño. Así, o itinerario contaba con catro paradas para avituallamiento: no Porriño, en Redondela, en Arcade e en Pontevedra. En todas as paradas había a posibilidade de pór fin á camiñada e terminala en coche. A marcha, que adoita celebrarse na primavera, tivo que aprazarse con motivo da pandemia por covid-19.
