Ningunha das once titulacións que se imparten no campus de Pontevedra, incluíndo a modalidade presencial e a semipresencial do Grao en Dirección e Xestión Pública, pechou aínda a súa matrícula.
Así o mostran as listaxes publicadas este luns pola Comisión Interuniversitaria de Galicia (Ciug), segundo os cales, entre todas as carreiras ofertadas pola Universidade de Vigo, soamente en tres termináronse as prazas para novos alumnos de face ao próximo curso, 2018-2019. Trátase das simultaneidades dos Graos ADE e Dereito impartidas no CUVI e no campus de Ourense e da simultaneidade de Turismo e Xeografía e Historia, tamén na sede ourensá.
Pola súa banda, a Universidade de A Coruña pechou a matrícula en once carreiras; a de Santiago en sete: os dobres graos de Comunicación Audiovisual e Xornalismo, de Dereito e Relacións Laborais, de Enxeñería Informática e Matemáticas, Matemáticas e Física, Química e Física, Educación Infantil e Primaria e de Mestre en Infantil e Primaria.
No caso do campus pontevedrés, unicamente unha titulación aumentou a súa nota de corte no segundo chamamento: o Grao en Ciencias da Actividade Física e do Deporte, que pasou do 8,208 sobre 14 da primeira rolda ao 8,406 nos listados feitos públicos este luns.
O Grao en Enxeñería Forestal mantense en 5,1, do mesmo xeito que o de Dirección e Xestión Pública, que conserva o peche en 5 tanto na versión presencial como na semipresencial. As demais baixaron as cualificacións de referencia para poder acceder, aínda que unhas fixérono máis que outras. A que máis, o Grao en Belas Artes, que a reduciu máis dun punto, pois agora ten de nota de corte un 6,37, fronte ao 7,432 do primeiro chamamento.
Na Universidade da Coruña hai once carreiras que xa non teñen prazas para novos alumnos e en Santiago, sete
Comunicación Audiovisual require un 8,99, fronte ao 9,232 anterior (na Universidade de A Coruña esa mesma titulación pechou xa matrícula cunha nota menor: 8,838). Educación Infantil ten actualmente como referencia un 7,70 en Pontevedra, fronte ao 7,83 da convocatoria previa (na Coruña o peche de matrícula estableceuse en 7,67) e Educación Primaria esixe un 8,378, fronte ao 8,486 anterior (na UdeC pechouse xa en 8,218).
Así mesmo, na capital do Lérez Enfermería pasou dun 10,16 a un 9,942; Fisioterapia dun 10,76 a un 10,65 e Publicidade e Relacións Públicas, dun 8,838 a un 8,44.
Por agora, o grao que máis reduciu a súa nota de referencia no campus pontevedrés é Belas Artes, en máis dun punto
A situación é diferente da do ano pasado en Pontevedra, posto que Comunicación Audiovisual pechara matrícula o 18 de xullo cunha cualificación de corte de 9,074, algo superior á sinalada por agora para poder acceder a ela o próximo curso.
Ciencias da Actividade Física fixérao o 26 de xullo cun 8,336 (menos que o requirido agora) e Fisioterapia, Publicidade e Educación Infantil e Primaria non se quedaron sen prazas ata setembro; no primeiro caso cun 10,55, no segundo cun 8,55, no terceiro cun 7,75 e no cuarto cun 8,08. Queda por ver o que sucederá este ano.
As relacións de alumnos admitidos e en lista de espera están expostas desde o luns nos LERD e na web http://ciug.gal e os interesados tamén poderán chamar ao teléfono 881813452.
O prazo de matrícula finaliza ás 14.00 horas do 27 de xullo.
