A Comandancia de Pontevedra acolleu este luns a presentación da asociación Justicia para la Guardia Civil (Jucil), unha nova organización que nace co obxectivo de reivindicar o dereitos socio laborais dos axentes, entre eles a equiparación salarial coas policías autonómicas.
Na rolda de prensa na que participou o secretario nacional da organización, Cristian Eric Marco, con motivo da serie de presentacións previstas en toda Galicia, os participantes informaron de que desde este luns hai unha nova dirección elixida polos asociados, cuxo secretario provincial é Aitor Varela Martínez (ata agora o portavoz na cidade era José Ares Muñiz).
Este colectivo esta vinculado a Jusapol (Justicia Salarial Policial) e, segundo explicou Cristian Eric Marco, decidiron constituírse oficialmente para ter representación nas mesas de negociación sobre as condicións laborais do colectivo e formar parte do Consello Nacional da Garda Civil.
Esta asociación busca reivindicar os dereitos socio laborais dos axentes, incluíndo tamén aos gardas de reserva. Entre eles, os seus membros destacaron a necesidade dunha equiparación salarial coas policías autonómicas que máis cobran e a maior dotación de medios humanos e materiais para o exercicio das súas funcións.
CÓDIGO PENAL MILITAR. Ademais, o colectivo reclama a derrogación do Código Penal Militar para xulgar aos gardas que comentan infraccións. Tamén se compromete a loitar pola reclasificación ao grupo B e "para terminar coas cinco brechas salariais", que segundo enumeraron son: asistencia a xuízos, xubilación, pagas extraordinarias, servizos extraordinarios e complementos específicos.
Jucil conta con 7.000 asociados en toda España, o que a sitúa como a segunda asociación en número de integrantes na Garda Civil. Na provincia de Pontevedra, teñen 137 socios, o 10% do persoal, segundo as cifras achegadas este luns polo seu secretario xeral.
