A peonalización da metade da Praza de Barcelos, no tramo que discorre fronte ao muro de Santa Clara e o colexio público, confirmou o que de seu era evidente: que se reduciu o número de coches que transitan por ela. En canto? Os aforadores instalados pola Policía Local confirman que o viario de dobre circulación habilitado na praza e que comunica Vasco da Ponte con Padre Gaite soporta unha media de 739 vehículos diarios.
Aínda que esta cifra non pode compararse con ningunha estatística anterior, xa que a zona funcionaba cun único sentido ata mediados do pasado mes de marzo, o certo é que os axentes municipais han constatado a redución da circulación de axitación nun 61,14 por cento. Onde? Nos automóbiles que, procedentes de Orillamar, daban voltas á Praza de Barcelos para buscar sitio para aparcar. En xaneiro deste ano, este tipo de tráfico supuña a entrada dun total de 6.082 coches ou motos a esta zona.
Os aforadores instalados este mes na praza pon de manifesto o esborralle do tráfico ata os 2.363 coches por día.
A reforma deste espazo precede ao novo plan de tráfico no centro, que limitará o uso do coche a residentes e servizos
Os accesos por Perfecto Feijóo tamén se reduciron, aínda que só un catro por cento, pasando dos 9.384 de xaneiro aos 9.022 de abril. O motivo débese a que moitos condutores seguen utilizando este viario como zona de paso cara a San Antoniño ou ao centro urbano.
En paralelo á baixada da presión de automóbiles en Barcelos, o Concello prevé novas melloras nesta contorna. Unha delas é o asfaltado do pavimento de lastros, que se atopa en mal estado en varios puntos da praza.
INTERVENCIóNS. Esta non será a única intervención que leva a cabo a Concellería de Obras Urbanas, que dirixe Luís Bará. O departamento municipal tamén contempla a instalación de pistas de xogos no tramo peonalizado, a ampliación do parque infantil, a mellora do lousado ou a reposición de mobiliario urbano.
Algunhas destas actuacións proceden das demandas da comunidade educativa, concretamente dos propios alumnos do CEIP Barcelos, que a través dun traballo escolar deseñaron como sería a súa praza ideal. O bosquexo, que se fixo chegar aos políticos, inspirou a reforma deste ámbito.
CRUZ GALLÁSTEGUI. As obras en Barcelos, que se executarán entre este ano e o que vén, tamén inclúen o ensanche de beirarrúas na Rúa do Rouco.
Os traballos neste espazo precederán á posta en marcha dos novos cambios de tráfico no centro, onde se limitará o uso do coche a residentes e servizos e cuxa implantación comezará en Cruz Gallástegui, Castelao e Daniel de la Sota.
