Un millón de billetes expedidos durante o seu primeiro ano. É a previsión para os novos autobuses que comezarán a prestar servizo na comarca a partir desta primavera. Case 2.700 ao día. Trátase do número de traxectos que Xunta e concellos estiman posible coa posta en marcha -esta vez si- das primeiras 27 liñas do transporte metropolitano de Pontevedra.
Se falamos de autobuses, o clásico "máis vale tarde que nunca" venlle como anel ao dedo á capital do Lérez. A solución á mobilidade entre os municipios da comarca fíxose de rogar preto de seis anos. Pero tras numerosos intentos e anuncios políticos frustrados, o acordo do goberno local coa Xunta e o desbloqueo xudicial ao concurso iniciado en marzo de 2019 liquida a posta en marcha destas primeiras 27 liñas, chamadas a ampliar o bus urbano actual de Pontevedra e, sobre todo, a mellorar o servizo coas localidades de Poio, Vilaboa e Marín, ademais de incluír seis traxectos mixtos que compartirán viaxeiros con escolares.
NA PRIMAVERA. Os trámites consumirán varias semanas, pero o Goberno galego espera que tras as festas do Entroido o contrato poida estar xa en vigor. Será o momento en que a UTE adxudicataria, formada por unha alianza entre os operadores Monbus e Rías Baixas, realice os axustes técnicos necesarios para operar cos futuros cartóns do transporte metropolitano, que entre outras vantaxes permitirán viaxar gratis aos menores de 21 anos. O obxectivo é que durante a primavera entren en funcionamento as 27 novas liñas integradas neste modelo.
Os menores de 21 anos viaxarán gratis e emitiranse bonos mensuais de prezo reducido para os usuarios habituais
Coa citada tarxeta, os usuarios gozarán dunha rebaixa do 10% que deixará o prezo do billete en 1,30 euros. A maiores aplicaranse novas bonificacións en canto o Concello de Pontevedra firme o convenio do transporte. E, ademais, o primeiro transbordo entre as liñas que formen parte do plan metropolitano será gratuíto e os usuarios habituais gozarán doutros descontos adicionais. A idea é establecer bonos mensuais cun prezo mínimo de 40 euros, e bonos de 20 viaxes para a liña Pontevedra-Marín e para os itinerarios que cheguen a Montecelo.
O orzamento para os dous contratos na contorna de Pontevedra rolda os 28 millóns de euros durante os dez anos de servizo. O Concello de Pontevedra reserva no seu proxecto de orzamentos para 2020 unha partida de 150.000 euros para transferir á Xunta en concepto de pago polo funcionamento destas liñas. Trátase dunha cantidade substancialmente maior da que viña destinando ata agora. En 2019, por exemplo, o custo do transporte público local -a liña a Monte Porreiro- foi de 71.849 euros.
Cando estes novos buses entren en funcionamento, ao proxecto de transporte urbano de Pontevedra quedará aínda por liquidar un apartado crucial. Trátase das conexións entre o centro urbano e as parroquias, onde reside case un 30% da poboación do municipio. Para este transcendental capítulo, o goberno local xa anunciou que quere probar un modelo pioneiro: o transporte a demanda. Ao longo deste ano contratará a unha empresa especializada para que realice un estudo que permita definir con exactitude as necesidades e o calado do futuro sistema. O seu custo será asumido polo Concello e completará o modelo de mobilidade que ata agora vén sendo unha carencia en Pontevedra e no modelo urbano que o BNG a imprimiu á cidade.
O propio alcalde, Miguel Anxo Fernández Lores, admitiu durante a última campaña electoral que ao longo deste mandato tería que estar liquidada esta cuestión: "Chegou a hora do transporte urbán", sinalou o rexedor.
NÚMERO DE VIAXES. A Dirección Xeral de Mobilidade da Xunta calcula que as 27 novas liñas que entrarán en funcionamento esta primavera xerarán 303.558 viaxes dentro do municipio durante o primeiro ano. Algo menos que a previsión fixada para os billetes expedidos entre Pontevedra e Marín (326.000 en cada sentido de circulación).
Nunha escala netamente inferior atópanse as estimacións para as viaxes entre Pontevedra e o municipio de Poio (pouco máis de 2.000 en cada dirección durante o primeiro ano); e as que afectarían os percorridos entre a Boa Vila e Vilaboa, que a Dirección Xeral de Mobilidade estima nunha contorna próxima aos 1.300 billetes.
