A Xunta de Goberno Local do Concello de Pontevedra puxo en marcha este luns o expediente para a contratación da instalación a iluminación do Nadal, do Entroido e das festas de verán (Santiaguiño e A Peregrina).
A portavoz do goberno local, Carme dá Silva, comentou en rolda de prensa que están "a celebrar as festas da Peregrina 2020" pero xa traballan "nas festas próximas" que, a estes efectos, serán as de Nadal.
Concretamente o expediente de licitación destina 140.000 euros para a iluminación deste Nadal, outro lote por 20.000 euros dedícase á iluminación do Entroido e figuran 40.000 euros para as festas do verán de 2021.
Estas cantidades supoñen un incremento de 25.000 euros respecto do previsto no pasado exercicio, pero a subida acapáraa a iluminación do Nadal que sumará 30 elementos decorativos máis que o ano pasado e reforzaranse algúns outros elementos como as bólas e as árbores.
A cidade contará con 30 elementos decorativos máis que o ano pasado
A intención é "chegar a máis rúas e máis prazas con máis elementos decorativos", dixo Carme da Silva pensando en que este ano, se a evolución epidemiolóxica permite ter unha celebración de Nadal adaptado á situación sanitaria. "Pensamos que é importante ter a iluminación como apoio tanto ao ambiente festivo como ao comercio local e á economía local".
Polo tanto, haberá máis luces de Nadal pero "sen esaxerar, sen que se converta nun problema ambiental", advertiu Da Silva.
SANEAMENTO. O Concello de Pontevedra tamén aprobou este luns na reunión da Xunta de Goberno a ampliación da rede de rede de sumidoiros na parroquia de Alba.
Concretamente os beneficiados por esta medida son os lugares de Touceda, Ponte Cabras, O Bispo e A Devesa. O proxecto tamén alcanza aos lugares da Cendona, na parroquia de Lérez e o lugar de Vigario, na de Cerponzóns.
O importe total deste proxecto é 1.652.000 euros e vai dar servizo a 83 vivendas. Isto quere dicir que o custo por vivenda chega aos 20.000 euros, aínda que a cifra final é maior (case de 30.000 euros por vivenda) xa que a esta cantidade habería que sumar o prezo da conexión do proxecto de Cerponzóns co doutras parroquias.
Ademais das redes de saneamento, tamén hai un tramo dun quilómetro de reparación de redes pluviais existentes e tamén se inclúe no proxecto un bombeo colectivo no lugar da Devesa para dar servizo a un número importante de casas.
