O Servizo de Protección da Natureza da Garda Civil, o Seprona, puxo a lupa nos furanchos de Pontevedra. O obxectivo destas inspeccións é controlar que os loureiros cumpran coa esixente normativa municipal, que foi a primeira deste tipo en entrar en vigor en Galicia. Fíxoo en abril de 2013 logo das protestas do sector hostaleiro, que vía neste tipo de establecementos unha competencia desleal, e dos propios furancheiros, que esixían regras claras para evitar a perda dos seus excedentes de produción de viño.
Un furancho de Campañó supera a inspección realizada o 28 maio por dous axentes do Servizo de Protección da Natureza
Un dos últimos controis do Seprona afectou a un furancho de Vispo, en Campañó. Dous axentes do instituto armado foron os encargados de cotejar que o local cumpría con todos os requisitos do regulamento pontevedrés. E así foi.
A acta redactada polos gardas civís o pasado 28 de maio examinou ata once puntos, destacando no apartado de Observacións que o loureiro "si presenta declaración responsable". Nela, os responsables destes locais informan o Concello das análises que debe superar o viño que vaia pór á venda e outras cuestións de índole técnica e administrativa.
Na súa inspección, o Seprona fixo constar que o propietario do furancho contaba con todas as autorizacións e as esixencias do regulamento municipal. Entre elas, posuír a obrigatoria licenza de actividade, a citada declaración responsable, seguro en regra, dispor de follas de reclamacións para os clientes, ter o loureiro debidamente sinalizado, posuír indicacións sobre a prohibición de formar no local, ter os barrís de viño numerados, despachar a comida regulamentaria ou respectar as datas e horarios de apertura.
Os establecementos deben ter seguro, acreditar que o viño procede dos seus viñedos e que a súa carta se limita a cinco tapas
O REGULAMENTO. Todos os furanchos de Pontevedra deben contar cun seguro de responsabilidade civil dun mínimo de 90.000 euros, ter os seus viñedos inscritos no Rexistro Vitícola de galicia para acreditar que o viño que vai vender procede das súas leiras, colocar unha rama de loureiro no exterior do establecemento e o distintivo Furanchos de Pontevedra no interior.
A ordenanza municipal tamén establece un límite de tapas para este tipo de establecementos. Cinco en total: táboa de embutidos e queixos, orella ou chourizo, zorza ou raxo, tortilla e pementos de Padrón.
Ademais, os loureiros só poderán abrir un máximo de tres meses en horario de 17.00 a 1.00 horas de luns a xoves e cunha xornada máis ampla os venres, sábados, domingos e festivos.
O regulamento local, que puxo en marcha o edil socialista Antón Louro, tamén establece a creación dun Rexistro Municipal de Furanchos e Loureiros que xestiona o servizo municipal de Urbanismo. O control do cumprimento dos requisitos legais corresponderá ao Concello, en primeiro termo, e aos inspectores de Turismo da Xunta de Galicia, en segundo termo, polo que a inspección destes establecementos por parte do Seprona podería derivar dalgunha denuncia.
