Luns 3 de maio á primeira hora da mañá. Ese será o momento no que a Xunta dará saída ás obras de ampliación de Montecelo, valoradas en 130 millóns de euros e adxudicadas á unión temporal de empresas formadas por Copasa, Pontes e Ogmios.
O proxecto, coñecido como Gran Montecelo, consistirá na construción dun novo hospital e a súa conexión co actual complexo, que será reformado nunha segunda fase. A obra implicará a intervención de algo máis de 2.600 traballadores e conta cun prazo de execución de 42 meses, polo que debería estar lista en outubro de 2024.
Segundo fontes consultadas, a Xunta abonou finalmente aos expropiados 3,8 millóns de euros, 200.000 euros máis dos que figuraban nos seus últimos cálculos. Entre as propiedades afectadas constan cinco casas, un viveiro e leiras privadas, cuxos titulares acudiron á vía do justiprecio para elevar a tasación inicial. Algúns incluso prevén recorrer agora ao TSXG.
O Gran Montecelo nace coa vontade de unificar nun único complexo a asistencia que se presta en Montecelo, o Provincial e Mollabao. Ademais, implicará a posta en marcha de servizos na área sanitaria, como UCI Pediátrica ou Radioterapia.
