As obras do cruzamento peonil de Benito Corbal obrigarán finalmente a cortar ao tráfico Daniel de la Sota. As restricións empezarán este mércores, día no que comezarán as obras para mellorar o aspecto que presenta a intersección entre estas rúas e Cobián Roffignac, que se diferencia do resto da calzada polo seu pavimento de cor vermella.
O Concello informou este domingo do operativo de mobilidade a través dun comunicado de prensa, no que se sinalou que a duración dos traballos será de polo menos dúas semanas. Non se descarta a posibilidade de que a execución se prolongue por máis tempo se as condicións meteorolóxicas son adversas.
A "praza circular" que se deseñará na zona implicará o traslado da parada de taxis, que pasará de Daniel da Sota a Barcelos. Os autopatronos poderán ocupar as prazas do estacionamento en batería que hai fronte á Rúa Vasco da Ponte, deixando libres os estacionamentos reservados para persoas con mobilidade reducida.
O acceso a Benito Corbal para garaxes e servizos no tramo que vai de Sagasta a Daniel de la Sota terá que facerse desde Barcelos a través de Vasco da Poncte. Para iso colocarase a correspondente sinalización na confluencia entre a denominada milla de ouro comercial de Pontevedra e a Praza da Peregrina e na intersección entre Sagasta e Castelao. Durante os primeiros días do corte de tráfico reforzarase a información a condutores coa presenza dun operario de control de acceso. O dispositivo completarase con información á veciñanza e a colectivos afectados polas obras.
As obras no cruzamento peonil de Benito Corbal atrasáronse ata logo de Nadal para evitar que os traballos interferisen na campaña de vendas do comercio. A actuación, que executará a empresa Covsa por 48.000 euros, substituirá o actual asfalto vermello por formigón negro pulido. Crearase unha "praza circular" similar á que se fixo no tramo final de Fernando Olmedo.
