A construción do paseo peonil a Marín comezarán "ao longo de 2020". Así o confirmou este martes o delegado do Goberno en Galicia, Javier Losada, durante a presentación da obra á beira da ría de Pontevedra.
O proxecto, que está en fase de licitación, conta cun orzamento de máis de 2,5 millóns de euros e un prazo de execución de nove meses. A senda terá pouco máis de dous quilómetros de lonxitude e unirá Mollavao e Os Praceres.
A actuación está dividida en dous tramos. O primeiro, de 1.246 metros, dará continuidade ao paseo da avenida de Marín cara á PO-12. Para a súa execución será necesaria a supresión dun dos dous carriis desta autovía, o máis pegado ao mar, ata o ramal de enlace coa PO-11. A partir deste punto, a senda continuará polo trazado da estrada vella, que está pegado á ría e que está en desuso.
O novo itinerario terá unha anchura de 4,5 metros e disporá de dúas zonas diferenciadas: unha para peóns e outra para ciclistas a través dun carril-bici. Tamén se prevé a ampliación da rotonda de Mollavao, que terá 16 metros de diámetro.
O segundo tramo da obra terá unha lonxitude de 783 metros. Neste caso, a senda non ocupará a autovía a Marín, senón que sobrevoará a ría de Pontevedra a través dunha pasarela que irá desde as inmediacións de Ence ata a pasarela das mariscadoras dos Praceres. Esta estrutura será metálica e estará apoiada no leito mariño sobre pilotes de formigón.
A actuación tamén contempla a mellora da iluminación a través de balizas led ao longo da senda.
Losada confirmou, ademais, que solicitarase un anteproxecto ao Concello de Pontevedra para que o paseo peonil teña conexión real con Marín. Para iso será necesario conectar o barrio mariñeiro do Cabo (nos Praceres) co nó de entrada ao Porto de Marín, un ámbito que pertence ao Ministerio de Fomento e non á Dirección Xeral de Costas, que é o organismo que executará o paseo peonil.
A presentación do proxecto congregou este martes na ría a distintas autoridades. Entre elas estaban o alcalde de Pontevedra, Miguel Anxo Fernández Lores, que valorou de forma positiva o empuxón administrativo a esta obra; a alcaldesa de Marín, María Ramallo; a presidenta da Deputación, Carmela Silva; a subdelegada do Goberno en Pontevedra, Maica Larriba, e representantes dos grupos municipais de PP e Cidadáns.