Non van ter sorte os turistas que queiran visitar Pontevedra esta semana se non reservaron xa as súas noites de hotel: todos os establecementos da cidade colgan o cartel de "completo" nas súas portas ante unha avalancha de turismo comparable aos tempos de antes da pandemia.
Os hoteis da Boa Vila rozan o 100% de ocupación estes días, situación que comezou a primeiros de agosto e que, esperan os hostaleiros, chegue ata o día 25. Ademais, isto non só ocorre na cidade, senón que nos arredores "e resto das Rías Baixas" a situación é a mesma, conta Paula Lourido, presidenta da Asociación de Hostaleiros de Pontevedra. "Está a ser un mes de agosto moi bo", celebra, asegurando que o sector "está moi contento" polo movemento que hai.
A pesar de que estes datos de ocupación "moi altos" poidan sorprender, sobre todo aínda inmersos na crise do coronavirus e as restricións como consecuencia desta, o certo é que "menos o ano pasado, o mes de agosto adoita ser moi bo", explica a presidenta da Asociación. Os hoteis pontevedreses, segundo Lourido, volveron " antiga normalidade" no que porcentaxe de ocupación refírese, porque "o número de xente que nos está visitando é igual ao de 2019", último verán antes do estalido da pandemia.
PEREGRINOS. Ademais da recuperación do turismo en familia, estas boas cifras de reservas tamén teñen outro factor que as explica: albergues de peregrinos, debido ás posibilidades de contaxio nas súas habitacións, só poden operar cun 30% do seu aforo, o que obriga a moitos peregrinos do Camiño Portugués a recorrer aos hoteis para pasar a noite. "Levamos catro ou cinco anos con moitos peregrinos", relata Lourido, pero este ano está a ser especialmente rechamante porque os albergues teñen longas colas desde primeiras horas da mañá.
Pola outra cara da moeda, agora "hai moitísimos pisos turísticos" que fan a competencia aos hoteis, moitas veces "desleal" segundo apuntan outros hostaleiros, sendo esta unha opción moi recorrida polos visitantes. Con todo, nin este novo competidor evita o cheo nos hoteis.
A pesar do alto número de turistas, os seus lugares de procedencia reducíronse: este agosto "hai moi poucos estranxeiros", de feito, calculan desde a Asociación de Hostaleiros de Pontevedra, que tan só cinco de cada 100 veñen de fóra de España, cando anos atrás esta cifra era moito máis alta.
Ademais, "levamos un ano e medio sen ingresos", di Lourido, en referencia ao impacto que tivo o coronavirus nos desprazamentos turísticos, cando estivo restrinxida a mobilidade entre comunidades.
Aínda que para estes días xa non queden habitacións, os turistas que si conseguiron facer o seu reserva nalgún destes hoteis pagaron ao redor de 80 euros como mínimo por noite. O tope pode ata dobrarse e superar os 150 euros ao día nos hoteis máis luxosos da cidade.
