Ofensiva socialista contra a Xunta polo mal estado das vías autonómicas en Pontevedra. Os catro concelleiros do grupo municipal do PSOE no Concello denunciaron este mércores os problemas de mantemento e conservación de catro estradas que pasan polo municipio e que dependen da Consellería de Infraestruturas. A comitiva, liderada polo tenente de alcalde, Tino Fernández, percorreu varios puntos negros do sistema viario pontevedrés. Xunto a el estaban os tamén concelleiros socialistas Yoya Blanco, Iván Puentes e Marcos Rey.
"É un menosprezo flagrante aos pontevedreses, especialmente a aqueles que viven nas zonas rurais e os barrios máis afastados do termo municipal, que non merecemos unhas estradas autonómicas de vergoña, das peor conservadas de toda Galicia. Pontevedra xa está acostumada aos desplantes, ninguneos e deixazóns de funcións da Xunta, pero isto vai máis aló: condutores e peóns están a poñer en risco a súa integridade cada día ao circular por estradas máis propias de Suazilandia que do noso país. O señor Feijóo non pode discriminar os pontevedreses deste xeito", criticou Fernández a través dun comunicado de prensa.
O grupo socialista, que deixou de lado ao seu socio de Goberno, o BNG, nesta reivindicación, reclama melloras na seguridade viaria, sendas peonís e un plan de asfaltados para corrixir as deficiencias que presentan a estrada vella de Marín e os viarios que van a Xeve, Barro e Ponte Caldelas.
"Condutores e peóns están a poñer en risco a súa integridade cada día ao circular por estradas máis propias de Suazilandia", denuncia Tino Fernández
"A pintura é tan escasa en todas as estradas autonómicas que mesmo hai pasos de peóns que case nin ven, ou que entraña un evidente perigo. A seguridade viaria é unha materia pendente en todas elas porque, ademais do nulo mantemento, non hai actuacións que aposten por unha mobilidade integral, con sendas que teñan en conta ás persoas que camiñan ou carrís para aquelas que utilizan a bicicleta", engade o tenente de alcalde de Pontevedra.
MÁIS VÍAS. Segundo o PSOE, unha das vías que se atopa "pésima conservación" é a PO-546, que une Pontevedra co límite de Marín e que soporta o tráfico de camións que descargan en Ence. Ao longo dos seus 4,22 quilómetros abundan "os vultos, as fochancas e as tiras de asfalto afundido, cuarteado ou simplemente deteriorado". "Unha vergoña maiúscula" para Tino Fernández, que asegura que as beirarrúas desta zona "están abandonadas". "A Xunta, que hai anos que tiña que ter urbanizado toda esta contorna e construído unha senda peonil continua, tal e como lle propuxemos reiteradamente os socialistas, inviste selectivamente nos concellos onde goberna o PP e deixa o resto para cando lle cadre", engade.
Na PO-224 (na foto), que une Ponte Bora co alto de San Antoniño, na parroquia de Perdecanai (Barro), o grupo socialista detectou "fochancas, cuarteos e afundimentos" ao longo dos seus 10,8 quilómetros. Neste trazado tamén localizaron abundante vexetación invadindo as cunetas.
Neste caso, o tenente de alcalde de Pontevedra expón ao Goberno galego que constrúa un itinerario peonil seguro, "pois hai moita xente camiñando por esta contorna próxima ao río Lérez".
Os edís do PSOE no Concello denunciaron ademais o "mal estado" da PO-542, que vai do nó do Pino a Ponte Bora. Varios tramos desta vía de 6,87 quilómetros están "cuarteados", especialmente nun dos seus tramos, no que se aprecian varias fochancas" e onde os pasos de peóns están "semiborrados".
Outra das vías obxecto de crítica é a PO-532, entre A Ermida e Ponte Caldelas. Aínda que hai dous anos fíxose un arranxo parcial, Fernández solicita melloras nas beirarrúas.
