A operación desenvolvida entre o xoves e o venres pola Brigada Central de Estupefacientes no corazón de Pontevedra (con ramificacións noutros enclaves, tanto da provincia como de Madrid), serviu para deixar claro o que xa era un segredo a voces: as relacións entre os narcotraficantes galegos e colombianos para a introdución de grandes alixos de cocaína por vía marítima está máis forte que nunca.
Os 600 quilos de po branco comisados nunha vivenda da avenida de Bos Aires son só a punta do iceberg dunha sorte de tormenta perfecta denunciada meses atrás polos expertos, unha avalancha de alixos procedentes de Sudamérica froito da sobreproducción de folla de coca na selva colombiana e do "cambio de traballo" dos antigos paramilitares das FARC, agora reconvertidos a señores da droga.
Os quince detidos (unha cifra que podería ascender ata 17 ou 18), repartidos case ao 50 por cento entre galegos e colombianos, son unha mostra máis de que as relacións entre uns e outros florecen, como o é o feito de que os suramericanos confiaron nos galegos non só para a introdución e a almacenaxe da mercancía no chalé de Pontevedra, senón que tamén contaban con eles para o posterior transporte dos paquetes ao arrabalde de Madrid, onde estaban fincados os responsables do cártel.
A xornada deste venres serviu para que os especialistas do Greco Galicia e os membros da sección de Cocaínicos da Brigada Central de Estupefacientes desprazados á Boa Vila completasen os interrogatorios iniciais, paso previo ao traslado de todos eles á capital de España para porlles a disposición da Audiencia Nacional, que coordina as pescudas.
Que 2017 e 2018 foi o bienio que supuxo a volta á primeira plana dos grandes alixos de cocaína en Galicia está máis que acreditado, non só pola intervención recentemente completada en Pontevedra, senón polos golpes policiais que lle precederon: caída en agosto da organización presuntamente liderada por Paul Wouter (2.500 quilos no Titan III, con Manuel e Melchor Charlín entre os detidos); desarticulación en xullo dunha rede que pretendía coar en Galicia 2.900 quilos ocultos en senllos veleiros; operación contra o clan dos Boyacos, con preto de 3.000 quilos máis incautados, e operación Mito, coa detención de Sito Miñanco, David Pérez Lago, Ramiro Somoza ou Quique Arango, entre outros.
