A Audiencia Provincial de Pontevedra condenou a sendas penas de dúas e tres anos de prisión aos acusados no marco da operación Chan, traballo das policías Local e Nacional que serviu para desarticular o importante foco de venda de substancias estupefacientes que rexentaban na zona limítrofe entre os termos municipais de Marín e Pontevedra.
O Grupo SAI da Policía Local e o equipo de Estupefacientes da Comisaría uniron esforzos para acreditar tales actividades e incautar no domicilio do principal investigado (a súa parella sería o seu cómplice) un alixo de 300 gramos de haxix, 100 gramos de cocaína e ata medio quilo de marihuana, cantidades todas elas moi relevantes tendo en conta que vendían ao consumidor final.
O ditame da Sección Segunda contempla a suspensión da execución da pena de cárcere en ambos os casos, a condición de que non delincan nos seguintes anos. No caso do principal responsable do punto negro, ademais, esixe que continúe co tratamento de deshabituación da drogodependencia na UAD da cidade de Pontevedra.
Un e outro non poderán eludir o pago das multas, dada a relevante cantidade de droga que foi incautada. A Audiencia imponlle o pago de 7.889 euros ao home e de 3.995 euros á muller, con penas de cárcere no caso de que decidan non pagalas.
