A recadación dos 54 concellos da provincia de Pontevedra que teñen delegada a xestión de taxas ou impostos no servizo ORAL da Deputación superou en 2017 os 122 millóns de euros (122,6), o que supón dous millóns máis que o ano anterior, unha subida do 1,6%.
A Deputación non cobra taxas nin impostos, limítase a recadar os dos concellos que o piden
Son datos ofrecidos este luns polo deputado de Economía, Facenda e Réxime Interior, Carlos López Font, con motivo do inicio do período de cobro dos grandes impostos, como o IBI. Así mesmo, recordou que con este servizo a institución "non cobra nin taxas nin impostos; ao que se limita é a recadar eses impostos e esas taxas daqueles concellos que o delegan e o convenian", en alusión a comentarios dunha "deputada da oposición" en sesión plenaria.
Polo tanto, apuntou, a Administración provincial fai "o que lle piden e, a continuación, ingrésase o diñeiro aos concellos" correspondente á recadación de tributos como o Imposto de Actividades Económicas (IAE), o Imposto de Bens Inmobles (IBI), a viñeta (IVTM), a recollida de lixo, as sancións de circulación e, nalgúns casos, incluso as licenzas de apertura, licenzas urbanísticas e a xestión recadadora voluntaria doutras taxas e ingresos.
López Font insistiu en que os concellos elixen se queren que o ORAL xestione os seus tributos e cales deles. "A situación non é homoxénea", o que provoca que, por exemplo, Vilagarcía recade moito menos que Vilanova a pesar de ser un municipio máis grande, xa que só delegou o cobro das sancións de tráfico. Na comarca de Pontevedra son sete concellos os que teñen delegada a xestión tributaria no ORAL: Poio, Barro, Ponte Caldelas, Campo Lameiro, Cerdedo-Cotobade, A Lama e Vilaboa. En 2017 recibiron máis de dez millóns de euros da recadación das súas taxas e impostos.
Font tamén avanzou os datos de recadación do primeiro semestre de 2018, que superan os 40 millóns de euros, o que significa que as 14 oficinas que o servizo ten repartidas por toda a provincia levan xestionado máis que en 2017, pois a finais de xullo o ano pasado levaban 38,8 millóns de euros. Son 1,2 millóns de euros e un 3% máis que o ano pasado nas mesmas datas. No entanto, o deputado matizou que "non son datos significativos" xa que cada ano as variantes cambian e ademais os impostos máis importantes sempre se tramitan nos meses finais de ano, como é o caso do IBI, que comeza en breve.
O anterior ministro de Facenda, Montoro, obrigou aos concellos a afrontar a revisión do catastro
O "CATASTRAZO". López Font tamén informou dos primeiros datos do proceso de regularización catastral que se realiza nos municipios da provincia "a imposición do anterior ministro Montoro, que obrigou aos municipios a afrontar a revisión". Na provincia instaláronse puntos informativos en 17 municipios para asesorar aos veciños sobre as consecuencias do "catastrazo". Neles atendeuse, de momento, a 9.975 persoas e realizáronse 2.870 alegacións ou recursos.
Tras finalizar o período de presentación de reclamacións, o Ministerio enviará ao ORAL, en setembro, unhas 27.000 liquidacións na provincia, que despois liquidará en outubro. Na comarca de Pontevedra os puntos de atención informativa situáronse en Poio e Barro, onde se atendeu a 288 e 54 persoas afectadas, respectivamente.
