A nova ordenanza de mobilidade de Pontevedra entrará en vigor antes do verán. é a data que este martes puxo o concelleiro de Mobilidade, Demetrio Gómez Junquera, para a posta en marcha da normativa que dará máis prioridade ao peón en todos os espazos públicos. "Os peóns son sempre os que teñen a preferencia", recordou o edil do BNG logo da comisión informativa na que a oposición recibiu unha copia do texto.
PP e Cidadáns terán ata o venres para realizar as achegas que estimen oportunas. Farano no marco da comisión previa ao Pleno municipal do luns que vén, na que se ratificará a aprobación inicial do regulamento. A partir de entón, abrirase un proceso de exposición ao público e, con el, a fase de alegacións. Os interesados disporán dun prazo dun mes para reclamar cambios no documento.
Gómez Junquera informou de que o borrador da normativa, que recibiu as achegas dun particular e do colectivo ciclista Pedaladas nunha consulta pública previa a través da páxina web municipal, sufriu pequenos retoques desde a súa presentación aos medios de comunicación o pasado 2 de xaneiro.
O de maior calado afecta idade de circulación para as persoas que utilizan patinetes eléctricos, que se eleva de doce a 15 anos para non diferir das recomendacións da Dirección Xeral de Tráfico (DXT). O regulamento pontevedrés establece que os condutores dos vehículos de mobilidade persoal só poderán transitar polas estradas limitadas a 30 quilómetros por hora ou polas vías cunha velocidade menor.
A modificación máis anecdótica refírese ao nome do código de circulación municipal, cuxo título se cambia de orde por cuestións de carácter xurídico. A partir de agora pasará a chamarse Ordenanza reguladora da utilización dos espazos públicos e da mobilidade amábel.
Limitarase a velocidade a 10 km/h en vías rurais municipais sen beirarrúas ou beiravías de menos de 1,5 metros.
Non poderán circular por beirarrúas ou sendas. Si poderán facelo en áreas como o centro histórico ou o centro adaptándose á velocidade do peón.
Os menores de 12 anos poderán xogar cos seus patinetes sen molestar ao peón. E poderán ir en bicicleta pola beirarrúa se non superan os 6 km/h.
As persoas que vaian en cadeira de rodas ou outros vehículos que garantan a súa mobilidade terán os mesmos dereitos que o peón.
O tamaño dos lombos unificarase. Terán o mesmo deseño e a distancia entre eles será de entre 25 e 100 metros.
Prohibirase aparcar ou parar un coche encima de beirarrúas. Permitirase parar na calzada só en casos de urxencia e por dous minutos.
DE 1989. A posta en marcha da normativa local suporá, na práctica, a derrogación da de 1989, que se quedou obsoleta pola transformación urbana da cidade e as novas formas de desprazamento.
Unha das novidades do regulamento pontevedrés afecta as parroquias. As pistas do rural que estean en mans do Concello serán de prioridade peonil, o que obrigará aos condutores a extremar as precaucións. Nas vías que non teñan beirarrúas e naquelas nas que as beiravías sexan de menos de 1,5 metros, os vehículos deberán moderar a súa velocidade a dez quilómetros por hora.
A ordenanza tamén obrigará a que todos os vehículos circulen pola calzada. E isto inclúe a bicicletas e patinetes eléctricos, que non poderán transitar polas beirarrúas e outras áreas estritamente peonís. Por onde si poderán pasar é polo centro histórico ou en zonas de coexistencia, como as plataformas únicas. En caso de facelo por estas últimas (Michelena, O Gorgullón ou Lepanto, por exemplo) deberá ser a unha velocidade moderada e nunca superior a seis quilómetros por hora.
As carreiras e outras competicións quedarán prohibidas. A única excepción serán os menores de doce anos, que poderán xogar coas súas bicis e patinetes recreativos en espazos libres sen necesidade de estar en compañía dun adulto. Iso si, sen xerar molestias ao peón.
ATA 500 EUROS. A ordenanza tamén fará fincapé nos estacionamentos prohibidos en beirarrúas para evitar danos neste tipo de elementos da reforma urbana. As persoas que transporten un vulto, a persoas enfermas ou con diversidade funcional poderán parar de forma excepcional na calzada, pero por un máximo de dous minutos para non interromper a circulación. En áreas de coexistencia, como a zona vella ou en zonas de plataforma única, poderase estacionar de forma libre, pero por un máximo de dez minutos.
O regulamento loitará tamén contra a contaminación acústica, sobre todo en horario nocturno. Os condutores deberán evitar ruídos, polo que non se poderá tocar o claxon, salvo en casos de extrema necesidade. Tampouco se poderá circular coa música a todo volume ou a escape libre.
A normativa municipal, que prevé multas de 200 a 500 euros, segundo a gravidade dos casos, incorporará ademais as zonas con límite 30 e 10. Nas áreas de preferencia peonil, todos os vehículos (con ou sen motor) non poderán superar os seis quilómetros por hora nin tampouco circular a menos de dous metros de portais, garaxes ou cruces. En canto aos lombos, o seu tamaño unificarase, adaptándose á altura das beirarrúas.
