A Audiencia Provincial de Pontevedra outorgou firmeza á sentenza do Xulgado do Penal 4 da Parda que condena a un individuo a tres anos e cinco meses de prisión por varios delitos de violencia de xénero, logo de someter á súa parella a constantes "actos de violencia física e psíquica" nun punto da provincia que o ditame non desvela para preservar a intimidade da vítima.
A sentenza, contra a que aínda cabe recurso, explica que o procesado "tratábaa a golpes, empuxóns, agarróns e puñadas na cabeza, ademais de constantes menosprecios", especialmente nos últimos seis meses da relación, no ano 2016.
O xuíz explica que, ademais dos constantes insultos, impedía á súa parella ver á súa familia, controlando en todo momento o diñeiro que podía gastar. "A vítima viviu a situación con tal temor que pensou que a única forma de resolver estas situacións era suicidándose".
Entre os episodios concretos, a sentenza sinala un no que o acusado "colleu un coitelo e enarborouno facendo ademán de cravarllo", e outro no que "colleu un desaparafusador e púxollo cerca do pescozo e para asustala díxolle que a podía enterrar na horta, que ninguén se decataría".
Noutra ocasión, engade o ditame, colleuna polo pelo diante do neno que tiñan en común "tirándoa ao chan coa intención de facerlle dano".
Xunto ás citadas penas de cárcere, procedentes de dous delitos de malos tratos e outros dous de ameazas, a Audiencia impón ao agora condenado varias ordes de afastamento da vítima (que suman máis de cinco anos en total), a privación do uso de armas durante dous anos e a prohibición de comunicarse coa vítima durante cinco anos.
