O debate sobre o transporte público regresou este mércores ao Parlamento galego, que aprobou unha iniciativa do PP para que a Xunta reclame a Pontevedra a posta en marcha de liñas propias de autobús na cidade. A proposición foi apoiada polo PSOE, que presentou unha emenda para que o Goberno galego e o Concello da capital coordinen a implantación deste servizo e doutro máis: o transporte metropolitano, que inclúe rebaixas no prezo do billete nas viaxes entre distintos municipios.
En encargado de defender a postura socialista foi o deputado de Lugo Luis Manuel Álvarez, que recordou que a capital das Rías Baixas "ten unha certa continuidade urbana con Poio e Marín, polo que parece oportuno que se extendan os transportes a estes concellos".
Marcos Cal, deputado de En Marea
"O PP trae outra iniciativa electoralista. Viaxar en bus de Lalín a Pontevedra custa 6,8 euros. Disto non falan"
Álvarez deu o visto e prace á proposta do Partido Popular non sen críticas. "É unha iniciativa electoral. Así de claro. Veñen a falar do transporte urbano de Ferrol e Pontevedra. E case consegue vostede enternecerme", díxolle ao parlamentario do PP Jacobo Moreira, que foi o que defendeu a postura do seu partido neste asunto. "Imos aprobala porque nós, a diferenza do PP, queremos que se cumpran todas as leis", engadiu o deputado lucense.
A lei á que fixo referencia Álvarez, e na que o PP baseou a súa argumentación, data de 1985 e é a que regula as entidades locais. Nela, recóllese a obrigación de todos os municipios de máis de 50.000 habitantes a prestar o servizo de transporte público. "En Galicia hai dúas cidades que, 33 anos despois, non cumpren esta obriga legal: Ferrol e Pontevedra", dixo Moreira.
O deputado pontevedrés cre que Pontevedra trata de boicotear o bus urbano e tamén o metropolitano. "O BNG busca escusas. Viven moi cómodos na inoperancia. Están a privar do transporte ós veciños de once concellos", dixo en referencia a este último plan.
Jacobo Moreira, deputado do PP
"O Bng busca escusas. Viven moi cómodos na inoperancia. Están a privar do transporte ós veciños de once concellos"
MOREIRA E BARÁ. A resposta da bancada nacionalista non se fixo esperar. "Usan o Parlamento para facer campaña e desviar a atención sobre a incapacidade dA Xunta coas concesións do transporte", replicou Luís Bará, que presentou -sen éxito- unha emenda ao texto do PP. Nela, o BNG propuña un estudo serio pagado polo Concello para dar encaixe ao novo servizo de autobús na capital.
Tanto PSOE, como BNG e En Marea aseguraron que a iniciativa dos populares ten tinguiduras partidistas. "O Pp trae outra iniciativa electoralista. Viaxar en bus de Lalín a Pontevedra custa 6,8 euros. Disto non falan", reprochou o deputado de En Marea, Marcos Cal.
O debate do transporte en Santiago de Compostela xerou unha agre discusión entre Bará e Moreira. O primeiro díxolle ao parlamentario do PP que estaba a facer o "PRIMO", unha palabra que foi retirada do diario de sesións por parte do presidente do Parlamento galego, Miguel Santalices. O deputado popular referiuse ao nacionalista como "Che Bará" .
