O parque infantil da Praza 8 de Marzo xa está listo para o goce dos máis pequenos. Desde este mércores, o espazo está dispoñible cunha renovación integral, que supuxo un investimento de 20.023,56 euros, e mostra unha cara máis renovada coa introdución de novos xogos e un pavimento de seguridade de caucho que supón evitar grandes danos que poidan xurdir dunha caída de altura.
O acto de reapertura contou coa presenza do concelleiro de Desenvolvemento Sostible, Iván Puentes, o representante da empresa encargada de realizar o proxecto, Pablo Loureiro, e o xefe do Servizo Municipal de Parques e Xardíns, Manuel Fontán. Todos eles procederon á eliminación de precintos que mantiñan inhabilitado o espazo infantil.
O proxecto de remodelación, levado a cabo pola firma Baygar deu un xiro por completo á tradicional imaxe do parque, comezando pola restauración da estrutura grande de xogos de Kompan (coa substitución de madeiras degradadas, esmalte e verniz e a reparación das redes), seguido da reparación e mantemento das randeeiras, realizando o cambio pertinente de parafusos e tapóns, axustando as folguras que puidesen ter para evitar incidentes. Ademais, a empresa procedeu neste tempo á restauración tamén da estrutura pequena de xogos de Kompan, realizando á súa vez unha limpeza profunda e informatizando o espazo coa implantación de paneis informativos que se axustan ás novas medidas impostas, así como o tratamento e pintado de distintos elementos.
A actuación incluíu, doutra banda, a reparación do valado, substituíndo as pezas que se atopaban en mal estado por unhas novas que eviten, deste xeito, posibles atrapamientos dos máis pequenos xurdidos por un descoido.
A renovación finaliza coa substitución de papeleiras e a colocación de bancos para dar forma a un novo parque que conta con maior seguridade, recolocando ademais tres xogos de peirao que solapaban espazos de caída de seguridade.
Manuel Fontán destacou o "impecable traballo de restauración efetuado, que deixou os seus xogos e mobiliario mellor que cando foron estreados e sobre todo, que vai minimizar o risco de que se produzan accidentes". As obras seguiron o protocolo que marcou inicialmente a empresa Soluciones Técnicas de Lecer (STO) contratada polo concello para "verificar que se respectan as directrices comunitarias, valorar as reparacións necesarias e emitir os certificados de Enac" sinalou o socialista tras reinaugurar o parque.
