O Tribunal Superior de Xustiza de Galicia (TSXG) rexeitou a petición dun particular que pedía ao Concello a expropiación dun solar por ministerio "da lei", unha opción que contempla o actual PXOM para os terreos particulares que están catalogados como zonas verdes. A sentenza, dada a coñecer este luns pola portavoz municipal, Anabel Gulías, dá por válidos os argumentos dos servizos técnicos e do Xurado de Expropiacións de Galicia, que indicaban que a parcela non reunía os requisitos necesarios para este proceso.
O propietario solicitou sen éxito a ocupación 379,53 metros cadrados de terreos situados entre Josefina Arruti e a avenida de Vigo. Por este predio solicitaba unha compensación de 1.896.466,29 euros.
Tanto os servizos técnicos do Concello como os do justiprecio sinalaron nos seus informes que o solar estaba catalogado como chan urbano non consolidado e pendente de desenvolvemento urbanístico, o que impediría esta expropiación. No seu auto, o TSXG condena ao Concello e ao particular ao pago das costas deste proceso, valoradas en 1.500 euros.
Esta resolución non é a única que recibiu Pontevedra sobre a ocupación de leiras "por ministerio da lei". O pasado mes de maio transcendeu que o TSXG obrigaba ao Concello a indemnizar aos donos dun solar de 723 metros cadrados detrás da Rúa do Gorgullón, á beira do Gafos, con 853.914 euros. Os propietarios pedían 2,6 millóns de euros.