"Fai un relato extenso e moi elaborado, e manteno no tempo. É crible". Con esas palabras, os peritos do Estado que elaboraron os informes sobre o testemuño de J., presunta vítima de abusos sexuais, puxeron en dúbida a declaración do acusado, que negou realizar tocamentos de forma continuada á afillada da súa parella cando aínda non cumprira os dez anos de idade, tal e como defende a Fiscalía de Pontevedra. A acusación mantivo a súa tese á conclusión do xuízo que se celebrou este martes na Audiencia Provincial, solicitando catro anos e tres meses de prisión para o investigado. O seu defensa fixo o propio pedindo a libre absolución do procesado ao entender que non existiron os feitos denunciados pola pequena.
Un das testemuñas relevantes que declarou este martes foi o que era titor da vítima naquel momento. "A avoa estaba moi preocupada pola situación", dixo, ao que engadiu que "os seus compañeiros vían que intentaba autolesionarse. Reclamaba moita atención. Choraba nos baños". O docente engadiu que a menor lle dixo que llo conto á miña familia e ninguén me cre", e explicou que os tocamentos se producían en casa da súa madriña. "Él entraba cando ela estaba a durmir".
A tía da denunciante dixo saber "o que me contou a miña nai" (a avoa da vítima), "que me dixo que M. abusaba dela".
A vítima asegura que sufriu os feitos con menos de 10 anos
A esposa do acusado, pola súa banda, asegurou que a menor "durmía comigo, salvo cando viña o seu curmán", e dixo que "sempre iamos xuntas para a cama". Engadiu, ademais, que a vítima só ía á súa casa cando ela descansaba, descargando así de responsabilidade ao seu compañeiro sentimental. "Ela é mentireira", dixo, un pretexto que esgrimiu tamén o acusado. "Non fixen nada. Esta nena está a facer unha película", espetou.
Na quenda de informes, a fiscal do caso defendeu que "hai probas suficientes" para enervar a presunción de inocencia do acusado, talles como a ausencia de incredibilidade subxectiva (non se observa resentimento nin vinganza da vítima contra o procesado). Explica que o seu relato foi uniforme desde que llo contou á súa avoa e ao seu titor e despois en sede xudicial. "Existe persistencia na incriminación".
A defensa, na súa alegación final, sostivo a súa argumentación na declaración do acusado e da súa esposa no plenario.
Outra das testemuñas, a psicóloga do Sergas que a atendeu desde os seis ata os 14 anos, aproximadamente, explicou que "é inestable emocionalmente. Non superou a morte da súa nai, que se produciu cando tiña catro anos", ao que engadiu que tivo que vivir escenas duras "cando estivo no Vao cos seus avós maternos".
Esta mesma comparecente explicou que tamén tivo que presenciar os problemas coa droga do seu pai desde a infancia. A iso uníronse os supostos abusos sexuais e unha situación moi complicada no colexio, tal e como expuxo o seu titor, que explicou que chegaba a autolesionarse no que parecía unha clara chamada de atención.
Tras todos estes problemas, moitos deles causantes de secuelas psicolóxicas moi difíciles de reverter, a menor, aos seus quince anos, vive baixo a tutela da Administración no citado centro de Redondela.
