A fábrica que Ence posúe en Navia é o centro de maior capacidade de produción do grupo empresarial e, segundo a compañía, a fábrica de celulosas máis eficiente de Europa das que traballan no mercado de eucalipto. A súa capacidade actual de produción é de 685.000 toneladas anuais e a previsión é seguir ampliando o complexo coa construción dunha planta anexa para fabricar viscosa destinada a produtos téxtiles e hixiénico-sanitarios. A empresa calcula que as obras poderían empregar a máis de 900 persoas durante dous anos e que a nova factoría podería dar traballo a entre 125 e 150 persoas.
O plan estratéxico da compañía deseñado para o período 2019-2023 reservou máis de 450 millóns de euros para construír esta nova planta e executar diversas melloras de índole ambiental. En cambio, tanto a produción prevista como o orzamento dispoñible poderían variar (á alza) ante o hipotético peche de Pontevedra. De feito, dos 350 millóns reservados para Lourizán só se investiron 50 e o resto derivouse a Navia, á espera de ser executados.
Desde un lado da barreira poderíase concluír que o persoal de Navia recibiría con bos ollos ese desvío de fondos ou o peche de Celulosas Pontevedra, pero nada máis lonxe da realidade. O presidente do comité de empresa da planta de Navia, Javier Rodríguez, de CC OO, asegura que o cesamento de Lourizán "non nos influiría positivamente, senón que máis ben sería negativo, porque se prexudica ao grupo, tamén nos prexudica a nós".
O portavoz sindical explica que Navia xa está a traballar ao máximo da súa capacidade e que a ampliación que está agora mesmo sobre a mesa é para fabricar celulosa para viscosa. "A celulosa (para pasta de papel) que se deixaría de vender en Pontevedra venderíaa a competencia".
PECHE. O comité está "a seguir moi de cerca" o conflito de Pontevedra e, unha vez máis, traslada "todo o apoio" aos traballadores de Lourizán "porque son os nosos compañeiros". De feito, un bo número de empregados asturianos participou nalgunha manifestación en Pontevedra apoiando ao persoal. A última vez en 2019, cando a Avogacía do Estado decidiu achandarse na defensa da prórroga de Ence Pontevedra e a compañía reaccionou conxelando os investimentos.
O presidente do comité de empresa de Navia cre que o peche anunciado pola empresa non será tan inminente como auguran os prognósticos máis fatalistas. Segundo di, o prezo da celulosa está a experimentar un crecemento e a planta de Lourizán aínda pode ser "unha fábrica moi rendible". No entanto, si comparte que "para investir hai que ter unha seguridade xurídica" e que "se sabes que dentro de oito ou dez anos vas pechar, poderás ter a fábrica funcionando ata o último día, pero non investirás nela 200 millóns".
A fábrica de Navia xera 400 empregos directos e preto de 1.000 indirectos.
No entanto, o negocio da enerxía foi in crescendo nos últimos anos. Na actualidade conta con complexos enerxéticos en Huelva, Mérida, Cidade Real, Jaen e Córdoba. A previsión inicial era a de dotar tamén a Pontevedra dunha planta de biomasa, pero finalmente o proxecto foi posposto por falta de permisos. En 2019 Ence, que conta con máis de 1.100 empregados, xerou 1.908 GWh de enerxía renovable con biomasa.
