A Audiencia Provincial de Pontevedra acollerá o xoves un novo xuízo procedente dun dos numerosos delitos contra a liberdade sexual que se denuncian nos últimos meses. O acusado é un veciño de Ponteareas, ao que se atribúe a violación a unha nena de 14 anos que padecía unha discapacidade intelectual, así como de pedirlle que lle enviase fotos e vídeos de contido pedófilo.
Segundo se recolle no escrito de acusación de Fiscalía, os feitos remóntanse ao verán de 2017, cando a menor, que se atopaba en réxime de acollida, acudiu ao domicilio do acusado, unha persoa relacionada coa súa familia de acollida. Durante o mes de xuño dese ano, e co ánimo de satisfacer "o seu instinto sexual", o fiscal cre que o home "comezou a ter contacto telefónico" coa menor, "enviándolle mensaxes nas cales lle propuña manter relacións sexuais con el". En todo momento, o home era consciente de que a nena tiña 14 anos de idade e que sufría un atraso madurativo que lle causaba unha discapacidade do 35 por cento.
O acusado solicitou á menor que lle enviase fotografías espida e en actitude sexual "explícita", ao cal a accedeu, e envioulle tamén a ela fotografías. No mes de xuño de 2017, o procesado indicou á moza que saíse a pasear a unha zona de monte próxima á súa vivenda, "un lugar deshabitado e pouco concorrido onde se atopaba unha cuadra desocupada". Foi alí onde, segundo a investigación, a someteu a tocamentos e bicouna en contra da súa vontade, feitos que o Ministerio Público defende que se repetiron noutro día.
Tempo despois, na mesma cuadra, o home volveuse a citar coa menor, á que o fiscal asegura que violou "a pesar de que ela lle dicía ao procesado que parase". Isto repetiuse, segundo o fiscal. Por iso, pide para o acusado 19 anos e 10 meses de cárcere.