A Sección Segunda da Audiencia Provincial de Pontevedra acolle o próximo xoves (10.15 horas) a vista oral contra un veciño da contorna da capital do Lérez acusado de cinco delitos, tres de agresión sexual e dúas máis de lesións psíquicas, que presuntamente cometeu contra os seus tres sobriños (dúas nenas e un neno) cando apenas contaban con entre seis e once anos de idade. A Fiscalía solicita penas que suman 53 anos de cárcere para o investigado por uns feitos ocorridos entre 1996 e 2006 e que foron denunciados moitos anos despois, cando as vítimas xa son maiores de idade e reuniron as forzas suficientes para recordar o sucedido.
Entrando en detalle, a primeira das vítimas sufría os abusos do seu tío cando acudía á súa casa, "na que vivía cos seus pais e o seu irmán (avós e tío, respectivamente, da menor)". A moza recorda feitos ocorridos entre 1996 e 2011, desde que tiña seis anos de idade, "practicamente a diario, salvo os fins de semana", segundo indica o escrito de acusación elaborado pola Fiscalía. O procesado levábaa á habitación, sometíaa á súa vontade empregando a forza física e agredíaa sexualmente, á vez que lle puña películas pornográficas e se masturbaba.
A segunda das sobriñas recorda feitos que comezaron en 2005 e que se producían no mesmo lugar, a casa que o procesado compartía coa súa avoa. Alí, servíndose da súa superioridade física e "da súa condición de familiar", apunta o fiscal, tapáballe nariz e boca ata deixala sen respiración e superaba deste xeito calquera resistencia. "Isto sucedía case todos os días ata que a menor deixou de acudir diariamente a casa da súa avoa, pero o procesado continuaba coa súa conduta durante os fins de semana ata que cumpriu os nove anos, idade co que ela xa foi capaz de evitalo", indica o Ministerio Público, aínda que "o procesado trataba de colocarse ao seu lado en comidas familiares para tocala".
No caso do sobriño, os feitos denunciados sucederon en 2006, cando o menor tiña sete anos e estaba a durmir nunha habitación desa mesma casa. Neste caso, o procesado entrou na habitación na que durmía, espertouno e quixo obrigalo a que lle fixese unha felación, cousa que o pequeno evitou gritando e correndo fóra da estancia.
A consecuencia destes feitos, explica o fiscal, a primeira das menores sofre estrés postraumático agudo de inicio tardío "asociado a revelación de abusos", xunto a unha sintomatoloxía agorafóbica. Todo iso require tratamento psiquiátrico e farmacolóxico.
A segunda das menores padece estrés postraumático e un nivel importante de ansiedade, con síntomas tales como ataques de angustia, illamento ou dificultades para relacionarse, todo iso "congruente coas vivencias obxecto da denuncia", chegando a intentar autolesionarse de forma grave en 2019. Por todo iso está a tratamento psiquiátrico e farmacolóxico.
Xunto a iso, o Ministerio Público engade dous delitos de lesións psíquicas cometidas contra as dúas nenas, que sofren graves secuelas polo ocorrido, que comportan posibles penas de 5 anos máis en cada caso.
A iso hai que engadir unha orde de afastamento de 5 anos que entrará en vigor cando o procesado saia de prisión, ademais dunha indemnización para as vítimas.
