A Fiscalía solicita nove anos de cárcere para un home que será xulgado o vindeiro martes na Audiencia de Pontevedra acusado de abusar sexualmente dunha persoa con discapacidade física e psíquica.
Segundo o escrito de acusación, divulgado polo Tribunal Superior de Xustiza de Galicia (TSXG), os abusos producíronse "polo menos" durante 2015 e 2016, nun número "indeterminado pero elevado" de veces.
O acusado coñecía, engade o fiscal, as limitacións das facultades psíquicas da vítima, que presenta un "atraso mental moderado" e ten un grao de discapacidade do 70%.
A pesar diso, este adoitaba buscar á vítima "para satisfacer os seus impulsos sexuais" e, tras convencelo ofrecéndolle diñeiro ou gominolas, levábao a zonas apartadas ou á súa propia casa para abusar sexualmente del, sinala o fiscal no seu escrito.
Tras denunciarse os feitos, o xulgado de instrución número 2 de Marín decretou unha orde de afastamento, impedindo ao acusado achegarse a menos de 100 metros da vítima ou comunicarse con ela por calquera medio.
Ademais da pena de prisión, o fiscal pide ao tribunal que o acusado, ao que considera autor dun delito continuado de abuso sexual non consentido con abuso de trastorno mental e penetración, manteña ese afastamento da vítima durante dez anos e a indemnice con 20.000 euros polos danos morais sufridos.
