Nunca chove a gusto de todos e, no caso das obras urbanas, sempre hai cidadáns que se senten moito máis prexudicados que os demais. É o que ocorreu coa reforma da ponte do Burgo, iniciada hai meses, para levar a cabo unha profunda remodelación, que variará parte da súa estética e acondicionarao á actual normativa.
Este proceso obrigou, o pasado día 8, a restrinxir o paso de peóns sobre o viaduto, unha medida que xa se anunciou desde o Concello cando se informou das distintas fases da obra pero que non foi ata agora cando tivo repercursión. Concretamente foron os comerciantes do centro histórico, a través do Centro Comercial Urbano Zona Monumental, os que se dirixiron ao Concello para exporlle unha alternativa que permita seguir compatibilizando os traballos co tránsido de persoas.
"Por esta ponte cruzaban ao longo do día moitos veciños da zona do Burgo e doutras parroquias, que estacionan os seus vehículos pola zona. Este corte provocará que moitas desas persoas cambien as súas rutinas diarias e entren na cidade sen ter que pasar pola nosa zona monumental, o que suporá unha gran perda para os nosos asociados", indica o colectivo.
A ponte do Burgo acondicionarase á actual normativa
O CCU é consciente de que "as obras hai que sufrilas e que o Concello debe cumprir os seus prazos para non perder os fondos europeos" pero sopesa que se habilite "un pequeno paso peonil mentres dure a reforma".
