A proliferación de xabarís e os graves danos que causan en leiras de cultivo, ademais dos accidentes de tráfico provocados por estes animais ao cruzar as estradas, seguen xerando numerosas reivindicacións. Este venres foron os representantes de Unións Agrarias quen tomaron a palabra. Nunha rolda de prensa ofrecida en Pontevedra, realizaron unha petición pública á Xunta de Galicia para que contrate cazadores profesionais a fin de reducir a poboación de xabarís nos montes galegos.
O responsable de Gandería do sindicato, Javier Igrexas, e o seu encargado de Desenvolvemento Rural na comarca do Deza, Avelino López, explicaron que na actualidade a poboación destes animais na comunidade autónoma ascende a case 200.000 exemplares. Ao seu xuízo, esta cifra resulta "imposible de controlar" polos cazadores e tecores nas batidas que desenvolven, tendo en conta, ademais, que a Sociedade de Caza en Galicia suma menos de 42.000 licenzas e que a execución das batidas resulta "moi complicada".
Por este motivo, Unións Agrarias presentou unha iniciativa lexislativa popular no Parlamento de Galicia para reclamar que a Xunta aborde o problema do "exceso" destes animais e na que propón a contratación de cazadores profesionais que se dediquen ao control, unha medida que xa se probou con éxito noutros países como Francia ou Bélxica, indicou. O sindicato estima en máis de 15 millóns de euros os danos que sufriron os cultivos galegos desde o ano 2015 por culpa do xabaril, "sen que a Xunta adoptase medidas para paliar a situación", reprocharon os seus portavoces.
Ademais dos graves danos nos cultivos e das consecuentes perdas económicas para os agricultores, esta especie tamén está detrás de moitos sinistros viarios. Concretamente, segundo datos da Dirección Xeral de Tráfico (DXT) recollidos por Unións Agrarias, os xabarís provocan cinco accidentes cada día nas estradas galegas.
Finalmente, indicou que os 600.000 euros que a Administración galega destina para o control desta especie de face ao próximo ano resulta "escasa" para os responsables de Unións Agrarias, do mesmo xeito que cren "insuficientes" as batidas aprobadas pola Xunta de Galicia como urxencia cinexética para 30 concellos.
