Dúas clases inutilizadas por pingueiras e desprendementos no falso teito. É o balance dos danos causados pola choiva na Galiña Azul da Parda, na que os nenos de dúas aulas tiveron que ser recolocados este luns noutro dos espazos do centro. Os pais e nais denunciaron a situación do centro, con deficiencias desde "hai anos" que só se solucionaron pondo parches".
As primeiras choivas intensas do outono puxeron a proba un edificio que xa deu mostras deste tipo de problemas con anterioridade. "Durante este curso xa houbo días nos que se tiveron que cambiar de aula polas pingueiras, en canto empezou a chover tiveron estes contratempos, polo que veñen xa de antes", explicaba o luns unha nai.
Pola súa banda, a ANPA recolle firmas desde hai unhas semanas para instar o Concello a acometer as obras prometidas que poñan unha solución definitiva ao problema. Polo momento, os nenos afectados de dúas aulas de entre un e dous anos pasaron o día do luns na aula de Psicomotricidade xa que os danos provocados polas choivas causaron, ademais das pingueiras, o desprendemento do falso teito nun dos baños das aulas afectadas. Ademais, hai outras estancias do inmoble, concretamente aulas de bebés de cero a un ano, que non foron desaloxadas e nas que tamén hai filtracións de auga, segundo denuncian membros da ANPA do centro.
A Galiña Azul da Parda forma parte da rede de escolas infantís xestionadas por un Consorcio que depende da Consellería de Política Social. Con todo, o mantemento do inmoble corresponde ao Concello de Pontevedra. "Segundo o convenio de xestión asinado co Concello de Pontevedra en decembro de 2010 o mantemento corresponde na súa totalidade a esta administración local", explicaban fontes da Xunta a este xornal.
Neste sentido, o Concello asegura que xa existe unha partida de 41.188 euros para levar a cabo unha intervención definitiva, "pero non se pode actuar mentres non pare de chover", tal e como indicaban membros da Concellería de Benestar Social, que dirixe a socialista Paloma Castro. O que si se fixo este luns foi colocar unha cuberta impermeable para tratar de paliar os efectos da choiva de forma provisional.
Así, Paloma Castro asegurou que colocouse unha lámina de caucho de etileno propileno dieno para evitar que a auga siga penetrando no edificio. Do mesmo xeito, o xerente do Consorcio Galego de Servizos de Igualdade e Benestar, Perfecto Rodríguez, púxose en contacto co Concello de Pontevedra para interesarse polo estado do centro e urxir as reparacións pertinentes. Así, a Xunta pediu a Paloma Castro que "garanta o funcionamento da escola e que permita evitar que se supenda a actividade en ningunha das aulas afectadas".
O proxecto definitivo pasaría
Do mesmo xeito, lamentan que durante o luns non foron atendidos polo persoal responsable no Concello ao que quixeron denunciar a situación. Se os problemas no inmoble persisten, será difícil cumprir o cociente de alumnado por aula, de modo que é posible que, ao non dispor de espazos adecuados, agrúpense máis nenos e nenas do cociente estipulada por aula. Segundo aseguran fontes próximas ao centro, este luns faltaron bastantes pequenos por estar enfermos. Se este martes non se producen tantas faltas e as dúas aulas seguen inutilizadas, o centro terá problemas para acoller a todo o seu alumnado, denuncian.
