O Plan Composta, co que o Concello está a estender a reciclaxe de residuos orgánicos no ámbito urbano, chega xa a case un milleiro de domicilios e establecementos do centro de Pontevedra. Os datos facilitados este sábado polo Goberno local revelan que un total de 786 particulares e 206 negocios (restaurantes, tendas de alimentación, fruterías, florerías, hoteis, pensións, bares e concesionarios do Mercado de Abastos), sumáronse a esta iniciativa, que é de carácter voluntario.
A campaña de sensibilización e información que está a desenvolver a adxudicataria dos lixos, a empresa Cespa, está a ter "unha ampla aceptación". Así o subliñou este sábado o concelleiro de Residuos, Raimundo González Carballo, que informou de que nas últimas dúas semanas incorporáronse 300 domicilios a este proxecto. "Isto quere dicir que vai a un ritmo moi alto", destacou.
O obxectivo inicial do Concello é que o Plan Composta chegue a uns 2.000 usuarios. "Hai que agradecer ós veciños e veciñas de Pontevedra o seu compromiso e colaboración con este plan. Desta maneira, entre todos, imos conseguir que este sexa un programa exitoso", engadiu.
En canto aos números do sistema municipal, a recollida de lixo orgánico pasou de 400 a 1.500 quilos "en poucas semanas". Estes residuos convértense logo nun compost que, segundo o Concello, é "de gran calidade" e "con moi poucos impropios".
O Goberno local seguirá promocionando este plan entre os veciños do centro histórico e do ensanche da cidade, no que se instalaron 65 colectores de cor marrón. Só os veciños adheridos ao programa poden depositar os seus residuos nestas unidades grazas a un cartón magnético.
Nos novos colectores, con capacidade para 700 litros, os usuarios poderán botar froitas, verduras, peixe e espiñas, restos de comidas, pousos de café e infusións, cascas de ovo e froitos secos, papel branco de cociña (sen tinguiduras), pasta, arroz, carne, pan e ósos. é dicir, os mesmos restos que se utilizan nos composteros para transformar o lixo en abono natural.
