Un total de 34 centros educativos públicos de Pontevedra sumáronse este curso aos plans de formación permanente do profesorado, unha iniciativa posta en marcha pola Consellería de Educación atendendo á LOE, que destaca que "a cualificación e formación do profesorado, a investigación, a experimentación e a renovación educativa" son os factores que favorecen a calidade do ensino. Deste xeito, apunta o departamento autonómico na correspondente resolución, "a mellora da calidade da educación constitúe unha meta irrenunciable dos sistemas educativos e un dos seus piares básicos", xunto coa "salvagarda dun ensino que garanta a igualdade de oportunidades e a capacitación do alumnado coas competencias e o coñecemento necesarios para o seu pleno desenvolvemento na sociedade actual".
Esta rede de formación permanente do profesorado, que no ámbito da Boa Vila é o CFR Pontevedra, está especializada e axuda e apoia, baixo o principio de colaboración e traballo en equipo, o profesorado na consecución destes fins, achegando a formación ao lugar de traballo.
A finalidade dos plans de formación é actualizar e perfeccionar competencias profesionais docentes para mellorar a calidade educativa
Así, con esta convocatoria a Consellería pretende fomentar que os centros educativos públicos desenvolvan plans específicos de formación permanente que contribúan á autonomía do profesorado na súa formación, á mellora da práctica profesional, ao desenvolvemento do traballo en equipo e impulsar a investigación sobre os problemas que trae de seu a innovación metodolóxica e a súa posta en práctica. Estes plans pretenden responder ás necesidades do centro, tomando como punto de partida unha avaliación da súa situación co obxectivo final de aplicar na aula a formación recibida. As actuacións propostas deberán ser relevantes para diminuír o abandono e mellorar o éxito escolar, así como propiciar unha organización escolar que favoreza a transformación dos centros en organizacións capaces de crear e transmitir coñecemento e de xerar destrezas para a súa adquisición e posta en práctica.
DO INGLÉS Á SAÚDE. Neste curso sumáronse aos plans 158 centros educativos da provincia, dos que 34 corresponden ao municipio capitalino. Deles, catro son novos, o que non quere dicir que xa tiveran participado anos atrás. Son os CEIP de Ponte Sampaio e Plurilingüe Froebel, a EOI de Pontevedra e o IES A Xunqueira I.
Como centros de continuidade figuran, segundo a resolución da Consellería, outros 30. Entre eles están o CEE Pontevedra, o CMUS Manuel Quiroga, a Epapu Río Lérez e a Escola de Conservación e Restauración, ademais de 16 colexios, nove institutos e unha escola de Educación Infantil.
Os motivos que levan a cada centro a apuntarse a estes plans son diversos, pero deben encadrarse en liñas de traballo establecidas previamente. A súa finalidade é actualizar e perfeccionar as competencias profesionais docentes, para a mellora da calidade da educación e dos resultados escolares do alumnado.
No caso do colexio Froebel, a decisión veu motivada pola adhesión ao programa plurilingüe no segundo ciclo da Educación Infantil (Plurinfantil), polo que esta etapa tamén se imparte en inglés, explicou o director, Manuel Carpintero. "En anos anteriores pediramos formación en robótica, que se imparte en cursos superiores. Sempre é necesario formarse para mellorar".
No CEIP de Ponte Sampaio os docentes estanse a formar para desenvolver o proxecto Ponte Sampaio escola saudable, segundo explicou o seu director, Avelino Cabaleiro, que engloba tres aspectos: primeiros auxilios, alimentación saudable e reciclaxe e patios dinámicos e inclusivos.