Sábado. 22.09.2018 |
El tiempo
Sábado. 22.09.2018
El tiempo

A Policía Autonómica pon o ollo no consumo de alcol entre menores

Mozos participando no botellón organizado na Praza de Teucro o pasado sábado, con motivo do segundo fin de semana de peñas. M.B.
Mozos participando no botellón organizado na Praza de Teucro o pasado sábado, con motivo do segundo fin de semana de peñas. M.B.

Pontevedra foi un dos municipios nos que a semana pasada se realizaron un total de 123 inspeccións, cun saldo de 30 mozos identificados e un denunciado

As festas estivais adoitan ser escenario habitual dun consumo de alcol moi por encima da media. E os mozos son os que máis afán teñen por protagonizar eses botellóns na vía pública, algúns á conta de incumprir a normativa vixente, como é o caso dos menores de idade.

Para facer fronte a estas condutas, a Policía Autonómica levou a cabo a pasada semana unha serie de controis naqueles municipios onde maior fose o risco de desobedecer a lei. No caso de Pontevedra, a bautizada como festa de peñas, que se celebra os dous primeiros fins de semana de agosto, caracterízase porque miles de mozos alagan o centro histórico nun macrobotellón que comeza á primeira hora da tarde e prolóngase ata ben entrada a madrugada. E non son poucos os menores de idade que se camuflan entre os grupos de rapaces para sumarse á celebración etílica.

Por iso é polo que os axentes do Grupo de Menores da Policía Autonómica elixiron a este concello, xunto a outros oito, para efectuar un total de 123 inspeccións de control entre os días 6 e 12 do presente mes.

O resultado deste despregamento foi a identificación de 30 persoas e a inspección de 123 zonas de lecer, locais e centros comerciais. Ao mesmo tempo, levantáronse once actas de infracción: oito por consumo de alcol, unha por venda de alcol e dous pola presenza de menores nun local.

A Policía Autonómica recorda que desde a entrada en vigor da Lei 11/2010, de prevención de bebidas alcohólicas aos menores de idade, leva a cabo diversos dispositivos policiais por toda a comunidade galega, para velar polo cumprimento da mesma e previr o consumo deste tipo de bebidas polos menores de idade.

Nestes dispositivos, ademais das denuncias administrativas, tamén se informa aos propietarios dos locais do seu contido e das actuacións que deben levar a cabo para velar polo cumprimento da normativa.

A Policía Autonómica pon o ollo no consumo de alcol entre menores
Comentarios