Os cortes de tráfico polas Festas da Peregrina empezaron este martes pola noite. As rúas Raíña Vitoria e Alameda permanecerán pechadas ao tránsito de vehículos durante as próximas dúas semanas, ata o 20 de agosto (incluído). A Policía Local recoñeceu este martes que o operativo e os cambios introducidos nos viarios de acceso ao centro da cidade poden provocar retencións durante os primeiros días da súa posta en marcha.
Os axentes municipais redobrarán esforzos ao longo da denominada Semana Grande de Pontevedra para que o tráfico de coches sexa o máis fluído posible. Neste sentido, desde a Xefatura recoméndase que a entrada a Pontevedra á primeira hora da mañá se faga pola avenida de Domingo Fontán (no Nó de Bombeiros) e non pola ponte da Barca, como é habitual para os condutores procedentes de municipios como Poio.
Outro dos puntos conflitivos será o enlace entre Eduardo Pondal cara a Uxío Novoneyra, Cobián Areal e Benito Corbal. Neste ámbito porase en marcha un dispositivo especial de vixilancia con desvíos puntuais para evitar colapsos. O control redobrarase entre as dez da mañá e a unha da tarde.
Retirar ou ocultar un valo con sinalizacións do operativo leva sancións de 3.000 euros
Ao mediodía, coincidindo coa saída do traballo para moitas persoas, a Policía Local advirte de que unha das zonas máis sensibles será a que comunica Xeneral Rubín coa avenida de María Victoria Moreno e Manuel del Palacio ata a ponte das Correntes. Neste sentido, recoméndase o uso da autoestrada para desprazarse entre o Norte e o Sur da cidade.
VALOS. As restricións de tráfico non afectarán, con todo, os residentes, que terán garantido o acceso aos seus garaxes. Será o caso dos veciños da rúa Echegaray, que tamén se manterá aberta para servizos. Para acceder a este viario, os condutores poderán usar a Rúa Mestranza, a que discorre fronte á Factultade de Belas Artes e o Ambulatorio Virxe Peregrina. Para iso, investirase o sentido de circulación da Xeneral Martitegui.
O dispositivo vai acompañado con valos con sinalización temporal. A Policía Local recordou que a modificación, retirada, alteración ou ocultación deste tipo de estruturas leva sancións de 3.000 euros. Saltarse unha prohibición supón multas de 200. As zonas sensibles estarán vixiadas por cámaras de tráfico.
