Cada dúas semanas prodúcese un delito de violencia machista na cidade e é rexistrado pola Policía Local. Pero hai máis, xa que estes datos recollen só a actividade do corpo municipal e non teñen en conta as intervencións da Policía Nacional. Así se extrae da memoria da Policía Local de Pontevedra, que interveu en ata 24 ocasións ante episodios de malos tratos á muller ou quebrantamentos de ordes de afastamento en 2020.
Dos agresores, nove foron detidos polos axentes municipais e outros 14 imputados sen detención. O volume de delitos de violencia de xénero detectados pola Policía Local mantense estable con respecto ao ano 2019, cando foron 24, pero supón un aumento con respecto a exercicios anteriores, como 2014 ou 2015, cando se elaboraron doce atestados, a metade que o ano pasado.
En canto á idade media dos agresores, a maioría deles tiña máis de 45 anos, sete situábanse na franxa entre os 36 e os 45, catro tiñan entre 25 e 35 e un era menor de 25 anos.
Por outra banda, o equipo da Policía Local leva a cabo tarefas de protección ás vítimas conforme a un convenio coas Forzas e Corpos de Seguridade do Estado e adoita encargarse dos casos nos que se aprecia menos risco.
Así, 23 mulleres vítimas de violencia de xénero reciben na cidade protección por parte da Policía Local. Aínda que o reconto do Concello tampouco ten en conta a todas as mulleres que se atopan nunha situación de malos tratos, xa que as atendidas por axentes municipais son só unha parte do total. Das 23 mulleres con protección, en tres dos casos considérase que están nunha situación de risco medio e en doce en risco baixo, aínda que ao longo do ano houbo sete casos nos que o nivel de risco percibido pasou a ser alto por momentos.
Catro das mulleres con protección en vigor teñen aos seus agresores en prisión. En total, a Policía Local ten constancia de sete homes do concello encarcerados por motivos de violencia de xénero.
Realizáronse 30 chamadas a vítimas para informar da saída dos seus agresores de prisión para gozar de permisos
ACTUACIÓNS. Entre as actuacións policiais levadas a cabo para velar pola seguridade das vítimas atópanse, por exemplo, 361 contactos telefónicos coas mulleres para coñecer o seu estado, 51 controis a agresores e as súas contornas ou 54 acompañamentos da vítima a xulgados e outro tipo de trámites. A Policía Local tamén realiza tarefas de vixilancia sobre as vítimas en zonas como as proximidades do seu posto de traballo, o seu domicilio ou o colexio dos nenos. Nestes casos, a muller adoita ser consultada sobre se prefire que os axentes se presenten uniformados ou non. En 2020 requiriuse a presenza de patrullas uniformadas por parte das vítimas en ata 21 ocasións.
Ademais, a Policía Local comunica ás mulleres as saídas dos seus agresores de prisión cando gozan dalgún tipo de permiso. En total, ao longo do ano pasado realizáronse 30 notificacións deste tipo.
