Os policías locais deixarán de prestar servizos de carácter voluntario. Farano como forma de protesta polo conflito que manteñen co Concello, que se basea principalmente nunha reivindicación salarial. "Seguiremos facendo o noso traballo. Pero non imos colaborar con outras funcións que non nos corresponden", avanzou este venres o delegado de Comisións Obreiras, Antonio Milleiros. Entre estas accións figurarían, por exemplo, as relacionadas con cursos de seguridade viaria.
O colectivo iniciou tamén unha campaña contra o alcalde, Miguel Anxo Fernández Lores, e a concelleira de Seguridade Cidadá, Carme da Silva, aos que acusan de tratar de "menoscabar " a imaxe dos axentes municipais por reducir as súas reclamacións á defensa de "privilexios". Entre as iniciativas asociadas a esta actuación figuran a colocación de carteis por media cidade na que se contrapón o salario do rexedor do BNG co destes traballadores públicos.
O Goberno local asegura que aos policías locais ofrecéuselles un incremento económico de ata o 11%, unha cifra que inclúe a subida do 1,75% aprobada xa polo Estado.
O colectivo sostén que a proposta non é suficiente e reclaman que se revise o estudo que vai determinar o diñeiro que cobrarán a través de distintos pluses, entre eles o de perigo. Tamén esixen que se aplique unha subida de categoría aos axentes para equiparalos aos compañeiros doutras zonas.
POR WHATSAPP. Outro das frontes que mantén o persoal policial alude ás recentes declaracións de Da Silva, nas que acusaba ao PP de estar detrás do intento de boicot do pregón das Festas da Peregrina protagonizado por un grupo de axentes municipais. "Apupouse só ao alcalde e á concelleira. Non se interrompeu o pregón. Se alguén opina que se fixo, non foi a nosa intención", manifestou Milleiros.
O delegado de Comisións Obreiras, que este venres compareceu cunha compañeira de sindicato e un responsable de persoal de UXT, asegura que as accións que se están levando a cabo contan co apoio do colectivo. Ben a través das distintas asembleas, como a celebrada o pasado 5 de agosto, ou por medio dun grupo de WhatsApp no que hai "uns 90 policías" e a través do cal se coordinan distintas actuacións.
