Mario O., presunto enlace entre os galegos e o dono da droga, e Pedro R., patrón do narcopesqueiro Titán III, serán postos en liberdade nas próximas horas. Iso será así logo da noticia do adiamento da vista oral dimanante da operación Barranca Bermeja, despregamento policial que se traduciu na imputación de 21 persoas por intentar introducir nas Rías Baixas un alixo de 1.700 quilos de cocaína.
Máis de dous anos e medio despois de ser detidos, os citados sairán do cárcere (con medidas preventivas, iso si, como a privación dos seus pasaportes e a obriga de comparecer semanalmente en sede xudicial), dada a dilación prevista para o inicio do macroproceso xudicial, que se irá máis aló da segunda quincena de xullo para as cuestións previas e ata o mes de setembro para os interrogatorios.
Foi o propio fiscal Antidroga de Pontevedra, Pablo Varela, quen se viu na obriga de solicitar a excarceración de ambos. Mario era, segundo os investigadores da Policía Nacional, o nexo entre as Rías Baixas e o capo Sergio de Carvalho, alias Paul Wouter, fuxido da Xustiza e que simulou a súa morte por coronavirus para eludir as súas responsabilidades non só neste proceso, senón na operación Enterprise, na que a Policía Federal de Brasil lle atribúe o tráfico de máis de 50.000 quilos de cocaína. Pedro seguía entre reixas ao ser
Sergio de Carvalho, alias Paul Wouter, presunto dono da cocaína, segue fuxido tras finxir a súa morte por coronavirus
A xornada deste luns serviu para testear a capacidade da Audiencia Provincial de Pontevedra para acoller un plenario con 21 acusados e os seus correspondentes letrados en tempos de covid. Nese sentido resultou un éxito, pois todos eles compareceron con máscaras e distancias no salón do Xurado do Pazo de Xustiza de Rosalía de Castro.
Con todo, producíronse dúas incidencias relacionadas con avogados da defensa que fixeron imposible a continuación da sesión. A primeira, unha lesión nunha perna da representante legal de Serafín P. e José Andrés R. Sobre o seu caso, a Sección Cuarta (que dirixe o xuízo ante a contaminación da Sección Quinta con sede en Vigo) expón a opción de que sexan xulgados en solitario cando a súa letrada se recupere. A segunda, o incipiente embarazo doutra das letradas, e que desembocou no citado adiamento á espera de que dea a luz e teña a súa baixa de maternidade.
A operación Barranca Bermeja, desenvolvida pola sección Greco Galicia da Brigada Central de Estupefacientes, tivo o seu punto culminante en agosto de 2018, cando, ademais da interceptación do buque coa droga, foron detidos todos os agora procesados e varias persoas máis, incluído o capo Carvalho, probablemente o narco máis poderoso xamais arrestado en Galicia.
O seu caso foi extraordinario, pois o xuíz instrutor púxoo en liberdade baixo fianza (que pagou sen despeitearse) sen saber a súa verdadeira identidade, que non transcendeu ata que Brasil deu conta de que aquel home que se presentaba como o surinamés Wouter era en realidade un antigo membro das forzas de seguridade erixido no maior traficante de cocaína do momento entre Suramérica e Europa. Sergio de Carvalho fuxiu deixándose en Lisboa unha furgoneta con doce millóns de euros en efectivo.
