Na provincia de Pontevedra, 1.235 mulleres son vítimas de violencia machista. Delas, 15 teñen menos de 18 anos e 484 teñen menores de idade ao seu cargo. Estas cifras tan só reflicten a aquelas persoas que están incluídas no sistema VioGén e que teñen unha orde de protección en vigor. Polo tanto, os datos reais poderían chegar a ser moito máis elevados.
Ante esta situación, desgraciadamente segue sendo fundamental reivindicar o fin da violencia machista, tal e como o fixeron este xoves as diferentes administracións de Pontevedra.
"Sabemos que o 80% da violencia de xénero non se denuncia e que só se conceden o 43% das ordes de protección que se solicitan no Partido Xudicial de Pontevedra", así o afirmaba o xoves Andrea Campos, promotora de igualdade, filla dunha vítima de violencia machista, e encargada de ler o manifesto do Concello polo 25N.
A Praza da Peregrina foi o lugar elixido pola Deputación e a corporación municipal para celebrar o Día Internacional para a Eliminación da Violencia contra a Muller. Un acto no que se puxo o foco na violencia vicaria, aquela que se exerce sobre a muller co obxectivo de facerlle dano a través de terceiras persoas, por exemplo, os seus fillos.
"Todos os días vemos como maltratadores que non se preocupaban nin interesaban polas súas crianzas, no momento do divorcio solicitan a custodia compartida, un amplo réxime de visitas ou incluso a custodia total, só por continuar en contacto coa muller e continuar o maltrato a través dos fillos e fillas", explicaba Campos antes de deixar claro que "hai que seguir berrando que o interese das crianzas será sempre o de manterse afastadas dos maltratadores" e "esa é a nosa obriga".
Neste sentido, no manifesto do Concello asegurouse que "o maltrato infantil é o factor de risco máis importante para presentar trastornos psicopatolóxicos na idade adulta, ata o punto de que segundo diversos estudos, o maltrato infantil estivo presente no 33% dos casos de trastornos de ansiedade, no 54% das depresións, no 64% das adiccións e no 87% dos intentos de suicidio".
Ademais, o goberno local tampouco se quixo esquecer do resto de violencias machistas e denunciou a violencia institucional, a sexual ou a mercantilización do corpo das mulleres, e asegurou que "por cada paso adiante na loita contra as violencias, ou sistema patriarcal contraataca con novas estratexias que esconden vos vellos argumentos de sempre".
Tras a intervención de Andrea Campos, no acto deste xoves falaron tamén a presidenta provincial e o alcalde da cidade do Lérez.
Carmela Silva definiu como "noxentos" e "cómplices" aos que negan o sufrimento das mulleres e volveu reclamar que esta loita estea no centro de acción de todas as políticas. "As mulleres estamos fartas e reclamamos que a loita pola igualdade e contra as violencias estea no centro de todas as actuacións", indicou.
Pola súa banda, Miguel Anxo Fernández Lores subliñou a "imprescindible" implicación dos homes nesta secuela. "A violencia contra as mulleres é a morte de toda a sociedade. Temos que seguir loitando porque aínda que pareza unha batalla sen fin, non nos podemos render".
PERFORMANCE. O evento conxunto da Deputación e o Concello contou tamén cunha performance enmarcada no programa Violencia Zero e que estivo a cargo da artista Alba Soto.
A creadora quixo visibilizar aspectos como o autoconocimiento das mulleres e a súa conexión grupal a través de elementos como unha máscara negra, mans de home ou tetinas.
SUBDELEGACIÓN. A Subdelegación do Goberno tamén alzou este xoves a voz contra a violencia machista.
Maica Larriba recordou ás 37 mulleres asasinadas no que vai de ano e destacou que "entre os obxectivos transversais do Goberno está a loita contra esta secuela que debe combaterse coa promoción da igualdade de dereitos entre mulleres e homes".
Neste caso, a escritora e crítica teatral feminista, Inma López Silva, foi a persoa encargada de ler a declaración institucional do Goberno. Un manifesto no que se recoñeceu que a loita contra a violencia machista "é unha política central na consecución dun país máis xusto, libre e igualitario".
Ademais, neste acto enviouse unha mensaxe de recoñecemento e homenaxe "a todas as mulleres, nenas e nenos vítimas da violencia machista que xa non están entre nós".
Todos os presentes gardaron un minuto de silencio en memoria das vítimas de violencia machista.
