Os datos de afiliación á Seguridade Social empezan a superar as cifras prepandemia. Segundo o Instituto Galego de Estatística, de xuño de 2020 a xuño de 2021 o número de persoas afiliadas aumentou nos sete grandes concellos galegos. Os datos referidos ao mes de xuño tamén reafirman este incremento nas sete cidades e Pontevedra rexistra o maior incremento entre as principais urbes, cun 3,67% máis, ata alcanzar as 29.295 altas laborais.
Así o recolle o estudo do IGE "Afiliacións á Seguridade Social por concello de residencia dá persoa afiliada", publicado onte.
Segundo este informe, tras a Boa Vila, destaca a alza do 2,89% en Santiago de Compostela, que rexistra un total de 37.544 altas laborais. Séguenlle a cidade da Coruña (+2,23% e 87.382 afiliados); Lugo (+1,64% e 36.488 afiliados); Ferrol (+1,30% e 17.990 afiliados); Vigo (+0,96% e 106.165 afiliados) e Ourense (+0,55% e 35.457 afiliados).
Por cada cen persoas que están en idade de abandonar o mercado laboral galego, 18 persoas ingresan na Seguridade Social
A nivel galego, no mes de xuño de 2021, rexistráronse 1.016.686 afiliacións á Seguridade Social en Galicia, o que supón un 3,1% máis que un ano antes.
Se se contabiliza o número de persoas afiliadas e non as afiliacións -unha persoa pode ter máis dunha-, a cifra total redúcese ata 966.649 individuos de alta, que tamén é un 2,8% máis que en xuño de 2020.
ESTRANXEIROS. Por outra banda, o 4% das altas laborais de residentes en Galicia corresponden a afiliados con nacionalidade estranxeira. Ademais das sete cidades galegas, as comarcas con maior peso de afiliados estranxeiros son A Mariña Central (o 8,4% dos afiliados), Valdeorras (7,6%), Verín (7,5%) e Viana (7,5%). En Pontevedra é un 3,50%, por baixo da media galega.
En canto á taxa de substitución de poboación activa, segundo os últimos datos do IGE, na comunidade galega por cada cen persoas que están en idade de abandonar o mercado laboral contabilízanse 18 persoas que ingresan no sistema da Seguridade Social. En Pontevedra esta taxa é do 16,7%.
No lado contrario, con menos afiliados á Seguridade Social atópanse os perfís máis novos. Así, só rexistráronse 102 altas en xuño de menores de vinte anos, das que 56 corresponderon a homes e 46 a mulleres, e 947 de mozas entre 20 e 24 anos. Neste último caso tamén é superior a porcentaxe de homes cun 56,5% e 536 altas máis, que o de mulleres, con 411 novos rexistros, o que se traduce nun 43,4% do total.
En anos anteriores a situación é similar. Os rangos de idade entre 40 e 50 anos son os que rexistran un maior número de altas á Seguridade Social, fronte aos menores de 20 e de 20 a 24 que contabilizaron as cifras máis baixas en xuño de 2020 e antes da pandemia, en xuño de 2019.
Por outra banda, das 942.239 persoas que figuraban afiliadas á Seguridade Social en alta laboral o 31 de marzo de 2021, en Galicia 44.530 persoas (o 4,7%) xa non estaban o 30 de xuño de 2021. Este trimestre déronse de alta máis acodes que de baixa polo que o saldo é positivo, 24.410 persoas afiliadas máis.
O grupo de idade que rexistrou un maior número de altas neste trimestre na comunidade galega foi o de 20 a 24 anos, seguido do grupo de 25 a 29 anos. Así, o 29,2% das persoas que se deron de alta en xuño pertencía a un destes grupos. No apartado referido ás baixas laborais, os grupos con maior incidencia no segundo trimestre de 2021 foi o de 40 a 44 anos e de 25 a 29 anos. Case 3 de cada 10 baixas laborais (2,5 para ser exactos) corresponden a persoas destes grupos.
